యూనికార్న్‌గా ఇన్‌క్రెడ్‌

న్యూఢిల్లీ: ఫిన్‌టెక్‌ కంపెనీ ఇన్‌క్రెడ్‌ 6 కోట్ల డాలర్ల రుణ సమీకరణ ద్వారా యూనికార్న్‌గా మారింది. పాత, కొత్త ఇన్వెస్టర్ల నుంచి ఈ రుణం సమీకరించినట్టు చెబుతున్నారు. ఈ రుణ సమీకరణతో కంపెనీ విలువ 104 కోట్ల డాలర్లకు చేరింది. ఈ ఏడాది యూనికార్న్‌ హోదా పొందిన రెండో కంపెనీ ఇది. తమ కంపెనీ ప్రయాణంలో ఈ ఫండింగ్‌ ఒక మైలురాయి అని, దీంతో తాము యూనికార్న్‌ల జాబితాలో చేరామని కంపెనీ సీఈఓ భూపీందర్‌ సింగ్‌ ప్రకటించారు. ఇన్వెస్టర్లు తమపై చూపిన నమ్మకానికి ఆయన కృతజ్ఞతలు తెలిపారు. ఇన్‌క్రెడ్‌ సంస్థ వినియోగ రుణాలు, విద్యా రుణాలు, ఎంఎస్‌ఎంఈ రుణాలు అందిస్తుంది. ఈ మూడు విభాగాలు మంచి వృద్ధిని నమోదు చేస్తున్నాయి.