పూల బొకే కన్నా పూల మొక్క మిన్న

ఒక ఫంక్షన్ గ్రాండ్‌గా జరిగింది, పూర్తయి పది నిమిషాలు అయింది. ముఖ్య అతిథులతో పాటు హాజరైన వారందరూ వెళ్ళిపోయారు. స్టేజ్ వెనుకనే వందలాది రూపాయలు పెట్టి కొన్న పూలదండలు/బొకేలు నిర్జీవంగా పడివున్నాయి. బొకేల జీవితం అది కట్టినంత సేపు ఉండదు. నూతన సంవత్సర వేడుకలతో పాటు వివాహాది శుభకార్యాలు ఎన్నో జరుగుతూ ఉంటాయి. ఎంత ఖర్చయినా ఒక ఫ్లవర్ బొకేని కొనుక్కొని వెళ్లి అభినందనలు తెలియజేస్తాం. ఏ ధరకి కొన్నా ఒక ఫ్లవర్ బొకే జీవితకాలం కొన్ని గంటలు లేదా ఒక రోజు మాత్రమే. ఫ్లవర్ బొకేకి బదులు 20-–30 రూపాయలతో ఒక పచ్చని మొక్కను కొని బహుమతిగా ఇచ్చి అభినందనలు తెలియజేయండి. పచ్చని మొక్కల్లా పది కాలాలపాటు వారు పచ్చగా ఉండాలని కోరుకోండి. మీరిచ్చిన మొక్క పూవు/కాయ పూచినంతకాలం వారికి గుర్తుకొస్తూనే ఉంటారు. అది ఒక తీపి జ్ఞాపకమవుతుంది. ప్రతి ఒక్కరూ సంవత్సరంలో కనీసం ఐదు మొక్కలైనా నాటండి. దీంతో పర్యావరణ పరిరక్షణతో పాటు, వంద రకాల జీవులు బతుకుతాయి. ప్రజాప్రతినిధులు, ప్రభుత్వ అధికారులు ఈ ‘ఫ్లవరు బొకే’ల సంస్కృతిని మాన్పించండి. ఒక పూల మొక్కతో హరిత శుభాభినందనలు తెలియజేయండి.

-– సాయిప్రకాష్ తిరునగరి