Bank Holidays: వరుసగా ఆరు రోజులు మూతపడనున్న బ్యాంకులు.. ఎప్పటి నుంచి అంటే?

న్యూఢిల్లీ: దేశ ప్రజలందరూ దీపావళి పండుగకు సిద్ధమవుతున్నారు. దివ్వెల పండుగను పురస్కరించుకుని దేశవ్యాప్తంగా అన్ని సంస్థలకు సెలవు ఉంటుంది. కొన్ని సంస్థలు రెండుమూడు రోజులపాటు సెలవులు ప్రకటిస్తే మరికొన్ని వారం రోజులపాటు సెలవులు ప్రకటిస్తాయి. ఇక తెలుగు రాష్ట్రాల్లో అయితే, దీపావళి రోజు గ్రహణం ఉండడంతో పండుగను ఎప్పుడు చేసుకోవాలన్న దానిపై కొంత గందరగోళం నెలకొంది. అయితే, ఈ విషయంలో జ్యోతిష్యశాస్త్ర నిపుణులు ఇప్పటికే క్లారిటీ ఇచ్చేశారు. కాబట్టి సోమవారమే జరుపుకోవాలని ప్రజలు ఓ నిర్ణయానికి వచ్చేశారు. 

దీపావళి వేళ బ్యాంకులు కూడా రేపటి (శనివారం) నుంచి వరుసగా ఆరు రోజులపాటు మూతపడనున్నాయి. అంటే బ్యాంకులు మళ్లీ తెరుచుకునేది వచ్చే వారమేనన్నమాట. ధంతేరాస్ సందర్భంగా శనివారం (అక్టోబరు 22) బ్యాంకులు మూతపడనున్నాయి. దీనికి తోడు నాలుగో  శనివారం కూడా కావడంతో ఆ రోజు సాధారణంగానే సెలవు రోజు. 23న ఆదివారం కాబట్టి ఆ రోజు కూడా సెలవే. 24న బ్యాంకులకు దీపావళి సెలవు. 25న లక్ష్మీ పూజ కారణంగా ఆ రోజు కూడా బ్యాంకులు మూతే. 26న గోవర్థన్ పూజ కాబట్టి ఆ రోజున, 27న బైదూజ్/చిత్రగుప్త్ జయంతి కారణంగా ఆ రోజున కూడా బ్యాంకులకు సెలవులు ప్రకటించారు.

ఇలా మొత్తంగా ఆరు రోజుల పాటు బ్యాంకులు మూతపడనున్నాయి. అయితే, ఈ ఆ రోజుల సెలవులు దేశంలోని అన్ని ప్రాంతాలకు వర్తించవు. కాబట్టి కొన్ని ప్రాంతాల్లో బ్యాంకులు పనిచేసే అవకాశం ఉంది. తెలుగు రాష్ట్రాల్లో మాత్రం శనివారం నుంచి 24వ తేదీ వరకు మూతపడతాయి. భారతీయ రిజర్వు బ్యాంక్ క్యాలెండర్ ప్రకారం ఈ  నెలలో బ్యాంకులు మొత్తంగా 21 రోజులు మూతపడతాయి. కాబట్టి ఏటీఎం నుంచి నింపాదిగా నగదు డ్రా చేసుకోవాలనుకునే వారు త్వరపడడం మంచింది. ఆ తర్వాత ఏటీఎంలు నిండుకుంటే వారం రోజులపాటు వేచి చూడాల్సి వస్తుంది.