సోమ పర్వతంపై తెలుగుతేజం!

పర్వతంపై 108 సూర్య నమస్కారాలు 

జగిత్యాల జిల్లా వాసి అరుదైన ఘనత 

మెట్‌పల్లి రూరల్‌, డిసెంబరు  31 : అది 1140 మీటర్ల ఎత్తైన పర్వతం.. ఎముకలు కొరికే చలి.. అయినా లెక్కచేయని ఆ యువకుడు తన లక్ష్యంపైనే గురి పెట్టారు. చివరికి ఆ పర్వతాన్ని అధిరోహించారు. అంతే కాదు, ఆ పర్వతంపై 108 సార్లు సూర్యనమస్కారాలు చేసి ఔరా అనిపించారు. ఈ ఘనతను సాధించింది జగిత్యాల జిల్లాకు చెందిన ఓ యువకుడు. మెట్‌పల్లి మండలం వెల్లుల్ల గ్రామానికి చెందిన మరిపెల్లి ప్రవీణ్‌ అమెరికాలోని మాట్రిక్స్‌ యూనివర్సిటీలో మాస్టర్‌ ఆఫ్‌ సైన్స్‌ చదువుతున్నారు. పర్వతాల అధిరోహణ ఆసక్తి కలిగిన ప్రవీణ్‌ అమెరికాలో 1140 మీటర్ల ఎత్తులో ఉన్న సోమ పర్వతాన్ని అధిరోహించారు. అంతేకాదు, 3 డిగ్రీల ఉష్ణోగ్రత వద్ద 108 సూర్య సమస్కారాలు చేశారు. ఇందుకు ఆయన 22.43 నిమిషాల సమయం తీసుకున్నారు. ప్రవీణ్‌ ఇప్పటి వరకు ప్రపంచ వ్యాప్తంగా 10 పర్వతాలను అధిరోహించారు.