హార్దిక్‌ పాండ్యా ఫిట్‌

దుబాయ్‌: ఆల్‌రౌండర్‌ హార్దిక్‌ పాండ్యా న్యూజిలాండ్‌తో జరిగే మ్యాచ్‌కు బరిలోకి దిగనున్నాడు. పాక్‌తో జరిగిన మ్యాచ్‌లో బ్యాటింగ్‌ చేస్తున్నప్పుడు కుడిభుజం నొప్పితో బాధపడ్డాడు. ఆ వెంటనే అతడికి స్కానింగ్‌ తీయించారు. ఇప్పటికే అతను పూర్తిగా కోలుకున్నాడని, ముందు జాగ్రత్త కోసమే స్కానింగ్‌ తీయించామని బోర్డు అధికారి పేర్కొన్నాడు. మరోవైపు నెట్స్‌లో పాండ్యా బౌలింగ్‌ కూడా చేయడం జట్టుకు సానుకూలాంశం కానుంది.

వేలంలోకి పాండ్యా!: ఐపీఎల్‌లో ముంబై ఇండియన్స్‌ స్టార్‌ ఆల్‌రౌండర్‌గా పేరు తెచ్చుకున్న హార్దిక్‌ పాండ్యాను అట్టి పెట్టుకునేందుకు ఆ జట్టు సిద్ధంగా లేనట్టు సమాచారం. దీంతో అతను ఆటగాళ్ల వేలానికి అందుబాటులో ఉండనున్నాడు. కెప్టెన్‌ రోహిత్‌, బుమ్రా, పొలార్డ్‌లను మాత్రమే ఆ జట్టు రిటైన్‌ చేసుకోనుంది. ఒకవేళ నలుగురికి అవకాశం ఉంటే సూర్యకుమార్‌, ఇషాన్‌ కిషన్‌లలో ఒకరిని అట్టి పెట్టుకోవచ్చు. కొంతకాలంగా బ్యాటింగ్‌లో ఫామ్‌ కోల్పోయిన హార్దిక్‌.. అటు బౌలింగ్‌కూ దూరమయ్యాడు. వచ్చే ఏడాది ఐపీఎల్‌ పది జట్లతో జరుగనుండడంతో ఈ ఏడాది డిసెంబరులో ఆటగాళ్ల  మెగా వేలం ఉంటుంది. ఇక రాబోయే రెండు కొత్త జట్లు కూడా వేలానికి ముందే ముగ్గురేసి కీలక క్రికెటర్లను ఎంపిక చేసుకునేందుకు బీసీసీఐ అనుమతించనున్నట్టు తెలుస్తోంది.