ఢిల్లీలో వచ్చే వారం నుంచి జిమ్‌లు ప్రారంభం!

న్యూఢిల్లీ : దేశ రాజధాని నగరమైన ఢిల్లీలో వచ్చే వారం నుంచి జిమ్‌లను తెరిచే అవకాశం ఉంది. కరోనా వైరస్ తగ్గుముఖం పట్టిన నేపథ్యంలో ఢిల్లీలో అన్ లాక్ చేయడంతో జిమ్ లు తెరవడానికి అనుమతి ఇవ్వాలని ఢిల్లీ జిమ్ అసోసియేషన్ రాష్ట్ర  ప్రభుత్వాన్ని కోరింది. ఢిల్లీ ముఖ్యమంత్రి అర్వింద్ కేజ్రీవాల్ ను ఢిల్లీ జిమ్ అసోసియేషన్ సభ్యులు సమావేశం అయ్యాక మీడియాతో మాట్లాడారు. జిమ్ లు తెరిచేందుకు అనుమతించాలని తాము సీఎం కేజ్రీవాల్ ను కోరగా, సానుకూల స్పందన వచ్చిందని, వచ్చే వారం నుంచి జిమ్ లను తెరవడానికి అనుమతిస్తామని సీఎం తమకు హామి ఇచ్చినట్లు జిమ్ అసోసియేషన్ ఉపాధ్యక్షుడు చిరాగ్ సేథి చెప్పారు.

 గత ఏడాది కాలంలో 6 నెలలపాటు ఢిల్లీలోని 5,500 జిమ్ లను మూసివేశామని, దీనివల్ల యజమానులకు తీరని నష్టం జరిగిందని సీఎంకు నివేదించారు.  జిమ్ లను మూసివేయడం వల్ల విద్యుత్, నీరు, అద్దెలు, సిబ్బంది జీతాలు చెల్లించడం భారంగా మారిందని జిమ్ యజమానులు ఆవేదనగా చెప్పారు. ఢిల్లీలో ఇప్పటికే బార్ లు, పబ్లిక్ పార్కులను తెరచినందున జిమ్ లను ప్రారంభించేందుకు వచ్చే వారం అనుమతి ఇస్తారని జిమ్ యజమానులు చెపుతున్నారు. కాని దీనిపై ఢిల్లీ సర్కారు నుంచి ఎలాంటి అధికారిక ప్రకటన ఇంకా వెలువడలేదు.