వైరస్ లాంటి టీకాను అభివృద్ధి చేసిన యూఎస్ శాస్త్రజ్ఞులు
ABN , First Publish Date - 2021-08-14T13:13:21+05:30 IST
అచ్చం కరోనా వైరస్ ఆకారంలో ఉండే నానోపార్టికల్ ప్రొటీన్ ఆధారిత టీకాను అమెరికా శాస్త్రజ్ఞులు అభివృద్ధి చేశారు.
వాషింగ్టన్, ఆగస్టు 13: అచ్చం కరోనా వైరస్ ఆకారంలో ఉండే నానోపార్టికల్ ప్రొటీన్ ఆధారిత టీకాను అమెరికా శాస్త్రజ్ఞులు అభివృద్ధి చేశారు. ఈ కొత్త టీకాను ఎలుకలపై ప్రయోగించగా సమగ్రమైన యాంటీబాడీ స్పందన, టీ సెల్స్ స్పందన ఉన్నట్టు తేలింది. టీకాలను శరీరంలోకి ప్రవేశపెట్టేందుకు గతంలో తాము తయారుచేసిన పాలిమర్ సోమ్స్ అనే ఉపకరణాల వల్ల కేవలం టీ సెల్స్ స్పందన మాత్రమే వస్తున్నట్టు గుర్తించిన యూనివర్సిటీ ఆఫ్ షికాగో శాస్త్రవేత్తలు యాంటీబాడీ స్పందనను కూడా పెంచే మార్గాలపై దృష్టి సారించారు. నానోపార్టికల్స్ను అచ్చం కరోనా వైర్సలాగా తయారుచేసి (అంటే.. ఆర్బీడీలను నానోపార్టికల్స్పై స్పైక్ ప్రొటీన్ల రూపంలో అమర్చి) ఎలుకల్లోకి ప్రవేశపెట్టారు. మూడు వారాల వ్యవధిలో ఇలా రెండు డోసులు ఇచ్చారు. దీంతో వాటిలో కరోనా వైర్సకు యాంటీబాడీలు ఉత్పత్తి అవడమే కాక, టీ సెల్స్ స్పందన కూడా పెరిగినట్టు వెల్లడించారు.