దేశంలోకి అడుగుపెట్టగానే NRI భార్యాభర్తలను అరెస్ట్ చేసిన కేసులో.. ఢిల్లీ హైకోర్టు కీలక ఉత్తర్వులు

ఎన్నారై డెస్క్: ఆ ఎన్నారై దంపతులు యూకేలో ఉండేవారు. ఏదో పనిమీద భారత్‌కు వచ్చారు. అలా వచ్చిన వాళ్లు ఢిల్లీ ఎయిర్‌పోర్టులో అలా దిగారో లేదో.. వారిని అక్కడి అధికారులు అదుపులోకి తీసుకున్నారు. విమానాశ్రయం నుంచి బయటకు వెళ్లకుండా అడ్డగించారు. దీంతో ఆ దంపతులు కోర్టులో పిటిషన్ వేశారు. దీనిపై విచారణ జరిపిన ఢిల్లీ హైకోర్టు.. వారిని విడుదల చేయాలని విమానాశ్రయ అధికారులను ఆదేశించింది. ఈ పిటిషన్‌పై తదుపరి విచారణ వరకూ పిటిషనర్లను అనుమతి లేకుండా దేశం దాటి వెళ్లొద్దన్న కోర్టు.. అధికారులు వీరిపై ఎలాంటి ఒత్తిడీ చేయొద్దని స్పష్టంచేసింది. వృద్ధులైన ఈ ఎన్నారై దంపతులిద్దరికీ ఒక చీటింగ్ కేసుతో సంబంధం ఉంది. ఈ క్రమంలోనే వీరిపై లుకౌట్ ఆదేశాలున్నాయని, అందుకే వారిని విమానాశ్రయంలో డిటెయిన్ చేశారని సమాచారం.

ఈ దంపతుల తరఫు న్యాయవాది కోర్టుకు ఇదే విషయాన్ని చెప్పారు. ఈ ఎన్నారై దంపతులపై ఎటువంటి కేసూ లేదని చెప్పిన లాయర్.. 2016లో పంజాబీ బాఘ్ పోలీస్ స్టేషన్‌లో ఒక కంపెనీపై చీటింగ్ కేసు నమోదైందని, సదరు కంపెనీతో ఈ దంపతులు కలిసి పనిచేశారని వివరించారు. సదరు కంపెనీపపై చీటింగ్ కేసు నమోదవగా వీరిపై నేరుగా ఎలాంటి కేసులూ లేవని లాయరు తేల్చిచెప్పారు. ఈ కేసు విచారణలో డిల్లీ పోలీసు శాఖలోని ఆర్థిక నేరాల  విభాగంతో ఈ దంపతులు పూర్తిగా సహకరిస్తున్నారని కోర్టుకు తెలిపారు. అయినప్పటికీ వీరిని విమానాశ్రయంలో బంధించారని, కనీసం ఆహారం, నీళ్లు, అవసరమై మెడిసిన్స్ కూడా అందుబాటులో లేకపోవడంతో పిటిషనర్లు చాలా ఇబ్బంది పడుతున్నారని లాయర్ వెల్లడించారు. ఈ వాదనలన్నీ విన్న కోర్టు.. దంపతులను విడుదల చేయాలని ఆదేశించింది. తదుపరి విచారణ అక్టోబర్ 8కి వాయిదా వేసి, అప్పటి వరకూ ఎన్నారై దంపతులను అనుమతి లేకుండా దేశం విడిచి వెళ్లొద్దని ఆదేశించింది.