అగ్రరాజ్యంలో మళ్లీ పేలిన తూటా.. 8 మంది మృతి!

జార్జియా, అట్లాంటా: అగ్రరాజ్యం అమెరికాలో మరోసారి కాల్పులు కలకలం సృష్టించాయి. యూఎస్‌లోని రెండు వేర్వేరు ప్రాంతాల్లో జరిగిన కాల్పుల్లో ఎనిమిది మంది మృతి చెందారు. అంట్లాంటా, అక్వర్త్ ప్రాంతాల్లోని మూడు మసాజ్ సెంటర్లలో మంగళవారం సాయంకాలం వేళ(అమెరికా కాలమానం ప్రకారం) ఈ కాల్పులు జరిగాయి. కాగా, మృతుల్లో ఎక్కువ మంది ఆసియా మహిళలే ఉన్నారని చెరోకి కౌంటీ పోలీసులు వెల్లడించారు. 21 ఏళ్ల ఓ అనుమానితుడిని అదుపులోకి తీసుకుని విచారిస్తున్నట్లు తెలిపారు.

వివరాల్లోకి వెళ్తే.. మంగళవారం సాయంత్రం 5 గంటల ప్రాంతంలో తొలుత అక్వర్త్‌లోని యంగ్ ఏసియన్ మసాజ్​ సెంటర్​ వద్ద దుండగులు కాల్పులు జరిపారు. ఈ ఘటనలో ఇద్దరు అక్కడికక్కడే చనిపోగా.. నలుగురు తీవ్రంగా గాయపడ్డారు. క్షతగాత్రులను చికిత్స కోసం ఆస్పత్రికి తరలించగా అక్కడ మరో ఇద్దరు మృతి చెందారు. కొద్ది సేపటి తర్వాత 6.00 గంటల ప్రాంతంలో అట్లాంటాలోని మరో రెండు మసాజ్​ సెంటర్ల వద్ద జరిగిన కాల్పుల్లో నలుగురు మహిళలు మరణించారు.

ఇలా గంట వ్యవధిలోనే చోటుచేసుకున్న ఈ రెండు కాల్పుల ఘటనల్లో 8 మంది మృతి చెందడం బాధాకరం. మృతుల్లో ఆరుగురు మహిళలు ఉండగా.. ఈ ఆరుగురు కూడా ఆసియా వాసులే. దీంతో రంగంలోకి దిగిన అట్లాంటా, చెరోకీ కౌంటీ పోలీసులు రాత్రి 8 గంటల ప్రాంతంలో 21 ఏళ్ల రాబర్ట్ ఆరోన్ లాంగ్ అనే అనుమానితుడిని అదుపులోకి తీసుకున్నారు. ప్రస్తుతం విచారణ కొనసాగుతున్నట్లు అట్లాంటా పోలీసు విభాగం అధికారి జాన్ చాఫీ వెల్లడించారు.