‘కొవిన్‌’లో పేరుంటేనే కొవిడ్‌ వ్యాక్సిన్‌

సాఫ్ట్‌వేర్‌లో సెల్ఫ్‌ రిజిస్ట్రేషన్‌కు అవకాశం

12 రకాల గుర్తింపు కార్డులలో ఒకటి ఉంటే చాలు

ఉదయం 9 నుంచి సాయంత్రం 5 వరకు వ్యాక్సినేషన్‌

రాష్ట్రానికో స్టేట్‌ కంట్రోల్‌ రూమ్‌ ఏర్పాటు 

తొలుత 30 కోట్ల మందికి కరోనా టీకాలు

వ్యాక్సిన్‌ నిర్వహణపై కేంద్రం మార్గదర్శకాలు

హైదరాబాద్‌, డిసెంబరు 12 (ఆంధ్రజ్యోతి) : కొవిడ్‌-19 టీకా నిర్వహణ మార్గదర్శకాలను కేంద్ర ప్రభుత్వం శనివారం విడుదల చేసింది. ప్రజలను రక్షించడం, కరోనా కారణంగా సంభవించే సామాజిక, ఆర్థిక ప్రభావాలతో పాటు మరణాలను తగ్గించడమే ప్రధాన లక్ష్యమని అందులో పేర్కొంది.  మొత్తం 113 పేజీల మార్గదర్శకాలలో కరోనా నివారణ, వ్యాక్సిన్‌, పలు స్థాయిల్లో టీకా నిర్వహణ, మానవ వనరులు, వారికి శిక్షణ,  కొవిడ్‌ వ్యాక్సిన్‌ ఇంటెలిజెన్స్‌ నెట్‌వర్క్‌ (కొవిన్‌) సాప్ట్‌వేర్‌, వ్యాక్సిన్‌ అందించే ప్రక్రియ, టీకా నిల్వకు సంబంఽధించిన శీతల గిడ్డంగుల వ్యవస్థ నిర్వహణ, టీకా దుష్ఫ్రభావం ఎదుర్కోవడం, పర్యవేక్షణ వంటి అంశాలకు సంబంధించిన విషయాలను ఆ మార్గదర్శకాల్లో పొందుపరిచారు.

కరోనా వ్యాక్సినేషన్‌ కార్యక్రమంలో మొత్తం 23 మంత్రిత్వ శాఖలను భాగస్వామ్యం చేసినట్లు అందులో వెల్లడించింది. వాటి పాత్ర ఏ విధంగా ఉండాలనేది ఆయా మార్గదర్శకాల్లో పొందుపరిచింది. కరోనా వ్యాక్సినేషన్‌ కార్యక్రమ విజయం అనేది, దాన్ని ప్రజలకు అందించే మానవ వనరులకు నాణ్యమైన శిక్షణ ఇవ్వడంపైనే ఆధారపడి ఉంటుందని పేర్కొంది.

మార్గదర్శకాల్లోని ముఖ్యాంశాలు..

 వ్యాక్సినేషన్‌ కోసం రాష్ట్ర, కేంద్రపాలిత ప్రాంతాలు ప్రత్యేకంగా ఒక రోజును కేటాయించాలి. ఉదయం 9   నుంచి సాయంత్రం 5 వరకు టీకాను ఇవ్వాలి. కొవిన్‌ సాప్ట్‌వేర్‌ ద్వారా గుర్తించిన లబ్ధిదారులకే  టీకాలు వేయాలి. 

సాధారణ పౌరులు వ్యాక్సిన్‌ కోసం ‘కొవిన్‌’ ద్వారా రిజిస్ట్రేషన్‌ చేసుకోదలిస్తే గుర్తింపు కార్డు తప్పనిసరి. అందుకు మొత్తం 12 రకాల గుర్తింపు కార్డులలో ఒకదానిని వాడుకోవచ్చు. వాటిలో ఆధార్‌, పాన్‌ కార్డు, పాస్‌పోర్టు, ఉపాధిహామీ కార్డు, బ్యాంకు పాస్‌ బుక్‌, పెన్షన్‌ ధ్రువపత్రాలు, ఓటరు ఐడీ, డ్రైవింగ్‌ లైసెన్స్‌, కేంద్ర, రాష్ట్ర ప్రభుత్వాలు జారీ చేసే గుర్తింపు కార్డులు ఉన్నాయి.

వైద్య సిబ్బందికి ప్రభుత్వ ఆస్పత్రుల్లో, ఫ్రంట్‌లైన్‌ వర్కర్స్‌కు స్కూల్స్‌, కమ్యూనిటీ హాల్స్‌,  హైరిస్కు పాపులేషన్‌కు పాఠశాలలు, కమ్యూనిటీ కేంద్రాలు, గ్రామ పంచాయతీ, మునిసిపల్‌ కార్యాలయాలతో పాటు మొబైల్‌సైట్స్‌ ద్వారా కరోనా వ్యాక్సిన్‌ అందించాలి. 

ఒక వ్యాక్సినేషన్‌ సెషన్‌లో 100 మందికే వ్యాక్సిన్‌ వేయాలి. 

వ్యాక్సిన్‌ కేంద్రంలో మూడు గదులు ఏర్పాటు చేయాలి. వేచి ఉండు గది, టీకా గది, అబ్జర్వేషన్‌ రూమ్‌ (వ్యాక్సిన్‌ తీసుకున్నాక వేచి ఉండే గది) ఏర్పాటు చేసుకోవాలి. టీకా తీసుకున్న వారిలో ఏమైనా దుష్ప్రభావం తలెత్తితే తక్షణ వైద్య సదుపాయం అందించాలి. 

వ్యాక్సిన్‌ తీసుకున్న వారి ఫోన్‌కు మెసేజ్‌ వస్తుంది. ఆ   లింకులో వ్యాక్సిన్‌ ఎక్కడ, ఎప్పుడు తీసుకున్నారు? తదుపరి ఎప్పుడు, ఎక్కడ తీసుకోవాలి; ఎవరు టీకా ఇస్తారు? వ్యాక్సిన్‌ బ్యాచ్‌ ఏంటన్న వివరాలు ఉంటాయి. 

వ్యాక్సినేషన్‌ ప్రక్రియ నిర్వహణ కోసం రాష్ట్ర,మండల, బ్లాక్‌ స్థాయిలో కమిటీలను ఏర్పాటు చేయాలి. ఆయా కమిటీలు, టాస్క్‌ఫోర్స్‌లు నిర్వర్తించాల్సిన విధులు, బాధ్యతలను మార్గదర్శకాల్లో పొందుపరిచారు. 

ఈ కార్యక్రమం కోసం అన్ని రాష్ట్రాలు స్టేట్‌ కంట్రోల్‌ రూమ్‌ను ఏర్పాటు చేసుకోవాలి. వ్యాక్సినేషన్‌ ప్రక్రియను ఎన్నికలా పకడ్బందీగా జరపాలి. 

తొలి దశలో దేశంలోని 30 కోట్ల మందికి వ్యాక్సిన్‌ను అందిస్తారు. వారిలో కోటిమంది వైద్య సిబ్బంది, 2 కోట్ల మంది ఫ్రంట్‌లైన్‌ వర్కర్లు, 27 కోట్ల మంది యాభై ఏళ్లు పైబడినవారు, దీర్ఘకాలిక వ్యాధిగ్రస్తులు ఉంటారు. 

ఆ నాలుగు విభాగాలు..  

వ్యాక్సినేషన్‌ బృందంలో నాలుగు విభాగాలు ఉంటాయని మార్గదర్శకాల్లో తెలిపారు. మొదటి విభాగంలో వ్యాక్సినేటర్‌ ఆఫీసర్‌ (ఎంబీబీఎస్‌, బీడీఎస్‌ డాక్టర్‌) స్టాఫ్‌నర్స్‌, ఫార్మసిస్ట్‌, ఏఎన్‌ఎమ్‌ ఉంటారు. వీరిలో ఒకరు కొవిడ్‌-19 టీకా వేయొచ్చు. రెండో విభాగంలో వ్యాక్సినేషన్‌ ఆఫీసర్లు,  పోలీసులు, హోంగార్డ్‌, సివిల్‌ డిఫెన్స్‌, ఎన్‌సీసీ, ఎన్‌ఎ్‌సఎస్‌ విభాగాలు ఉంటాయి. వీరిలో కనీసం ఒకరు ఉండి వ్యాక్సిన్‌ లబ్ధిదారుల రిజిస్ట్రేషన్‌ స్టేట్‌సను తనిఖీ చేయాల్సి ఉంటుంది. మూడు, నాలుగు విభాగాల్లో వ్యాక్సినేషన్‌ ఆఫీసర్స్‌ ఉంటారు.  ఇందులో ఉండేది అంతా సహాయక సిబ్బందే. వీరు టీకా ప్రచారం, క్రౌడ్‌ మేనేజ్‌మెంట్‌, వ్యాక్సినేటర్‌కు సహాయ సహకారాలు అందించాలి. 

కోల్డ్‌ చైన్‌ వాక్‌ ఇన్‌ వాక్‌ ఇన్‌ ఐస్‌ లైన్డ్‌ డీప్‌ ఫ్రీజర్స్‌ సోలార్‌

పాయింట్స్‌ కూలర్స్‌ ఫ్రీజర్స్‌ రిఫ్రిజిరేటర్స్‌ యూనిట్స్‌

తెలంగాణ 897 7 3 1,201 1,139 0

ఇండియా 28,932 240 70 44,226 40,792 294