ఒట్టేస్తే 2000

ఒట్టేయకపోతే 1000.. దుబ్బాకలో ఓ పార్టీ పంపిణీ

ఓటుకు 500 ఇచ్చిన 2 పార్టీలు.. జోరుగా మద్యం

సిద్దిపేట, నవంబరు 2 (ఆంధ్రజ్యోతి): ఒట్టేసి ఓకే చెప్పిన ఓటరుకు రూ.2000. ఒట్టేయకుండా ఓటేస్తానన్న ఓటరుకు రూ.1000! దుబ్బాక ఉప ఎన్నికల్లో ఓటుకు ఓ పార్టీ కట్టిన రేటు ఇది. దుబ్బాక ఉప ఎన్నికను మూడు ప్రధాన పార్టీలూ ప్రతిష్ఠాత్మకంగా తీసుకున్న విషయం తెలిసిందే. అయితే, గెలిస్తే.. గెలవాలి.. లేదంటే రెండో స్థానాన్నైనా నిలబెట్టుకోవాలని ఓ పార్టీ రూటు మార్చింది. మిగతా పార్టీలు కూడా డబ్బు, మద్యం పంపిణీ చేస్తాయని భావించి వ్యూహాత్మకంగా అడుగులు వేసింది.

తటస్థ ఓటర్లపై గురిపెట్టింది. గుట్టుచప్పుడు కాకుండా కుల సంఘాలకు తాయిలాలు పంచింది. క్షేత్రస్థాయిలో మోహరించిన ఆ పార్టీ బడా నేతలంతా తమ అనుభవాలను రంగరించారు. తమ స్కెచ్‌ సక్సెస్‌ అయితే గెలుపు రేసులో ఉంటామని, లేదంటే  రెండో స్థానం ఖాయమంటున్నారు. ప్రజల్లో నాలుగు రోజుల కిందటి వరకూ ఆ పార్టీ గురించి చర్చ కూడా లేదు.

కానీ, ఇప్పుడు ఆ పార్టీ గెలుపు గడప దాకా వచ్చినా ఆశ్చర్యపోనక్కర్లేదనే చర్చ జరుగుతోంది. కాకపోతే, ఎంపిక చేసిన కొన్ని ప్రాంతాల్లోనే పంచడంతో గెలుపుపై ఆ పార్టీ నేతలే అనుమానాలు వ్యక్తం చేస్తున్నారు. మిగిలిన రెండు పార్టీలూ ఓటుకు 500 చొప్పున పంచాయి! ఫుల్లుగా మద్యాన్ని సరఫరా చేశాయి.