కరోనా అనుమానంతో మృతదేహం అడ్డగింత

• పోలీసు బందోబస్తుతో అంత్యక్రియలు.. 30మందిపై కేసులు
• 
  

ఖమ్మం క్రైం, జూలై 21: కరోనాతో చనిపోయాడన్న అనుమానంతో ఖమ్మం ప్రభుత్వ ఆసుపత్రిలో చనిపోయిన ఓ వ్యక్తి అంత్యక్రియలను స్థానికులు అడ్డుకున్నారు. వైద్యులు, రెవెన్యూ సిబ్బంది ఎంత చెప్పినా వారు వినిపించుకోకపోవడంతో.. చివరకు పోలీసు బందోబస్తు మధ్య అంత్యక్రియలను పూర్తి చేశారు. అడ్డుకున్న సుమారు 30 మందిపై పోలీసులు కేసు నమోదు చేశారు. ఈ ఘటన ఖమ్మంలో జరిగింది. ఖమ్మం ప్రభుత్వ ఆసుపత్రిలో ఓ వ్యక్తి అనారోగ్యంతో చికిత్స పొందుతూ మంగళవారం మృతి చెందాడు. ఆయనకు కరోనా లేదని వైద్యులు నిర్ధారించారు. కుటుంబ సభ్యులు మృతదేహాన్ని అంత్యక్రియల కోసం నగర శివారులోని శ్శశానవాటికకు తీసుకువెళ్లారు. కానీ ఆ వ్యక్తి కరోనాతో చనిపోయినట్లు తెలిసిందని, ఎట్టి పరిస్థితుల్లోనూ అంత్యక్రియలు ఈ శ్మశానవాటికలో నిర్వహించకూడదని స్థానికులు అడ్డుకున్నారు. అధికారులు పోలీసులకు సమాచారం అందించగా.. త్రీటౌన్‌ సీఐ శ్రీధర్‌ తన సిబ్బందితో సంఘటనా స్థలానికి చేరుకుని స్థానికులతో మాట్లాడారు. అయినా కూడా వినిపించుకోకపోవడంతో 30 మందిపై కేసు నమోదు చేశారు. బందోబస్తు మఽధ్య అంత్యక్రియలు నిర్వహించారు.