సలామ్‌ సంతోష్‌!

ABN , First Publish Date - 2020-06-19T09:24:41+05:30 IST

దేశం కోసం ప్రాణాలర్పించిన ఆ వీరుడి పార్థివ దేహాన్ని చూసి గుండెలు కరిగి కళ్ల నుంచి కన్నీరై బొట్లుగా రాలాయి! శత్రుదేశం దుర్నీతిపై

సలామ్‌ సంతోష్‌!

  • వీర సైనికుడికి దేశం కన్నీటి వీడ్కోలు
  • కాసరబాద వ్యవసాయ క్షేత్రంలో అంత్యక్రియలు


లద్దాఖ్‌లో అమరుడైన కల్నల్‌ సంతోష్‌బాబుకు సూర్యాపేట కాసరబాద వ్యవసాయ క్షేత్రంలో గురువారం సైనిక, ప్రభుత్వ లాంఛనాలతో అంత్యక్రియలు జరిగాయి. అంతిమయాత్రలో 10 వేల మందికి పైగా పాల్గొన్నారు. సంతోష్‌ బాబు అమర్‌ రహే, భారత్‌ మాతాకీ జై.. చైనా డౌన్‌డౌన్‌ నినాదాలతో ఆ ప్రాంతం హోరెత్తింది.

  

సూర్యాపేట, జూన్‌ 18 (ఆంధ్రజ్యోతి): దేశం కోసం ప్రాణాలర్పించిన ఆ వీరుడి పార్థివ దేహాన్ని చూసి గుండెలు కరిగి కళ్ల నుంచి కన్నీరై బొట్లుగా రాలాయి! శత్రుదేశం దుర్నీతిపై ఆగ్రహంతో ఊపిర్లు సెగలు కక్కాయి. ‘చైనా డౌన్‌ డౌన్‌’ అంటూ నరాలు తెగేలా గొంతులు ప్రతిధ్వనించాయి.. ‘జై జవాన్‌’ అంటూ పిడికిళ్లు బిగుసుకున్నాయి. ‘ఓ వీరుడా.. నీ త్యాగం వృథా కాదు’ అంటూ అభినందనలతో పార్థివ దేహంపై దోసిళ్లు పూలజల్లు కురిపించాయి. అంతిమయాత్ర సాగిన దారిపొడవునా జన సంద్రమే. అందరి మదిలోనూ భావోద్వేగ సుడిగుండమే! లద్ధాఖ్‌ సరిహద్దులో చైనాతో జరిగిన ఘర్షణలో వీర మరణం పొందిన సూర్యాపేట వాసి, కల్నల్‌ బిక్కుమళ్ల సంతోష్‌ బాబుకు ప్రజలు కన్నీటి వీడ్కోలు పలికారు. సూర్యాపేటకు దగ్గర్లోని కాసరబాద వ్యవసాయ క్షేత్రంలో గురువారం సైనిక, ప్రభుత్వ లాంఛనాల ప్రకారం సంతోష్‌ బాబు అంత్యక్రియలు జరిగాయి. తండ్రి ఉపేందర్‌ చితికి నిప్పంటించారు.


ఎనిమిదేళ్ల కుమార్తె అభిజ్ఞ వేలును పట్టుకొని, నాలుగేళ్ల కుమారుడు అనిరుధ్‌ తేజను చంకనెత్తుకొని, మూగగా రోదిస్తూ భార్య సంతోషి చితిచుట్టూ తిరుగుతుంటే... ఏం జరుగుతోందో అర్థం కాని వయసులో అనిరుధ్‌ చితికి నిప్పంటిస్తున్న తాత చేతిని పట్టుకొని తండ్రికి కడసారి వీడ్కోలు పలుకుతుంటే.. చూసి భావోద్వేగంతో జనం కన్నీళ్లు పెట్టుకున్నారు. మంత్రి జగదీశ్‌ రెడ్డి, అధికార, విపక్ష నేతలు ఇతర ప్రముఖులు అంత్యక్రియల్లో పాల్గొన్నారు.