బ్రెజిల్‌లో కలకలం సృష్టించిన జార్జి ఫ్లాయిడ్ తరహా ఘటన!
ABN , First Publish Date - 2020-11-21T23:45:43+05:30 IST
బ్రెజిల్‌లో జార్జి ఫ్లాయిడ్ తరహా ఘటన చోటు చేసుకుంది. దీంతో దేశ వ్యాప్తంగా ఆందోళనలు మిన్నంటాయి. వివరాల్లోకి వెళితే.. పోర్టో అలిగ్రే నగరంలోని క్యారీఫోర్ స్టోర్‌‌లో సెక్యూరిటీ గార్డులుగా పని చేస్తున్న ఇద్దరు
బ్రెసీలియా: బ్రెజిల్‌లో జార్జి ఫ్లాయిడ్ తరహా ఘటన చోటు చేసుకుంది. దీంతో దేశ వ్యాప్తంగా ఆందోళనలు మిన్నంటాయి. వివరాల్లోకి వెళితే.. పోర్టో అలిగ్రే నగరంలోని క్యారీఫోర్ స్టోర్‌‌లో సెక్యూరిటీ గార్డులుగా పని చేస్తున్న ఇద్దరు శ్వేతజాతీయులు.. జోవో అల్బెర్టో సిల్వేరియా ఫ్రీటాస్ అనే 40 ఏళ్ల నల్లజాతి వ్యక్తిని గురువారం రోజు విచక్షణా రహితంగా కొట్టి చంపారు. సెక్యూరిటీ గార్డులలో ఒకరు జోవో అల్బెర్టో సిల్వేరియాను కాలుతో తొక్కిపట్టగా.. మరో గార్డు అతనిపై పిడిగుద్దులు కురిపించాడు. ఈ క్రమంలో తీవ్రంగా గాయపడ్డ జోవో అల్బెర్టో సిల్వేరియా.. ప్రాణాలు కోల్పోయాడు.
దీనికి సంబంధించిన వీడియో సోషల్ మీడియాలో వైరల్ కావడంతో శుక్రవారం రోజు నిరసనకారులు క్యారీఫోర్ స్టోర్ వద్దకు చేరుకుని దాన్ని ధ్వంసం చేశారు. అంతేకాకుండా దేశ వ్యాప్తంగా నిరసనకారులు జాతివివక్షతకు వ్యతిరేకంగా ఆందోళనలు చేపట్టారు. ఇదిలా ఉంటే.. జోవో అల్బెర్టో సిల్వేరియా మృతికి కారణమైన సెక్యూరిటీ గార్డులను పోలీసులు అరెస్ట్ చేశారు. అయితే జోవో అల్బెర్టో సిల్వేరియాపై సెక్యూరిటీ గార్డులు దాడి చేయడానికి గల కారణాలపై స్పష్టమైన సమాచారం లేదు. కాగా.. ఈ ఏడాది మేలో అమెరికాలో జార్జి ఫ్లాయిడ్ అనే నల్లజాతీయుడు పోలీసుల చేతిలో ప్రాణాలు కోల్పోయిన విషయం తెలిసిందే.
