ఎవరు సజ్జనులు?
ABN , First Publish Date - 2020-02-07T06:22:00+05:30 IST
పని ప్రారంభించి మధ్యలో వదిలిపెట్టడం తప్పే. దాని గురించి భర్తృహరి సుభాషితాలను తెలుగులో అందించిన ఏనుగు లక్ష్మణకవి పద్యం ద్వారా తెలుసుకుందాం.
పని ప్రారంభించి మధ్యలో వదిలిపెట్టడం తప్పే. దాని గురించి భర్తృహరి సుభాషితాలను తెలుగులో అందించిన ఏనుగు లక్ష్మణకవి పద్యం ద్వారా తెలుసుకుందాం.
తమ కార్యంబు బరిత్యజించియు బరార్థ ప్రాపకుల్ సజ్జనుల్
తమ కార్యంబు ఘటించుచున్ బరహితార్థ వ్యాపృతుల్ మధ్యముల్
తమకై యన్య హితార్థ ఘాతుక జనుల్ దైత్యుల్, వృధాన్యార్థభం
గము గావించెడువార లెవ్వరొ యెఱుంగ శక్యమే యేరికన్
ఎటువంటి వాళ్లు సజ్జనులు? ఎటువంటి వాళ్లు మధ్యములు? ఎటువంటి వాళ్లు నీచులు? కొందరు అవసరమైతే తమ పని పక్కన పెట్టి ఎదుటి వాళ్ల పని చేస్తారు. వాళ్లు సజ్జనులు. ప్రభుత్వ కార్యాలయాల్లో పనిచేసే ఉద్యోగులు ఇతరుల పనులను పూర్తి చేయడం పైనే దృష్టి పెడుతుంటారు. వాళ్ల సొంతపనుల గురించి ఆలోచించరు. అటువంటి వాళ్లు సజ్జనులు. కొంతమంది ఇతరుల పని చేస్తూ, వాళ్ల పని కూడా చేసుకుంటుంటారు. వాళ్లు మధ్యములు. వీళ్లు ఆఫీసు పని పూర్తి చేస్తూ, మధ్యమధ్యలో తమ సొంత పని కూడా చక్కబెట్టుకుంటారు. ఇక చివరగా కొందరు తమ ప్రయోజనాల కోసం ఇతరుల పనులన్నీ పక్కన పెడతారు. వాళ్లు నీచులు. ఆఫీసులో కూడా తమ సొంత పనుల గురించే ఆలోచిస్తుంటారు. మనం ఆ కోవకు చెందకుండా ఉండటం చాలా అవసరం.
డా. గరికిపాటి నరసింహారావు
Updated Date - 2020-02-07T06:22:00+05:30 IST
