రెండోసారీ సోకుతుందా?

ఒకసారి కరోనా పాజిటివ్‌ వస్తే, వ్యాధి తగ్గిన తర్వాత మళ్లీ అదే వ్యాధి సోకే అవకాశం ఉందా? ఈ ప్రశ్న అంతటా తలెత్తుతోంది. అయితే ఈ ప్రశ్నకు సూటిగా సమాధానం చెప్పే పరిస్థితి లేకపోయినా, ఇప్పటివరకూ జరిపిన అధ్యయనాలు, ప్రయోగాల ద్వారా వైద్యులు ఓ నిర్థారణకు వచ్చారు. 

సాధారణంగా చికెన్‌పాక్స్‌, మీజిల్స్‌ మొదలైన వైరల్‌ ఇన్‌ఫెక్షన్లకు గురైతే ఆ వ్యాధి మరోసారి సోకే వీలు లేకుండా, శరీరంలో యాంటీ బాడీలు తయారవుతాయి. అదే వైరస్‌ రెండోసారి ఎదురైనప్పుడు, ఆ వ్యాధి సోకకుండా ఈ యాంటీ బాడీలు జీవితకాలం రక్షణ కల్పిస్తాయి. అయితే ఫ్లూ, డెంగ్యూ, జలుబు మొదలైన ఇతర వైర్‌సల విషయంలో ఇలా జరగడం లేదు. కరోనా వైరస్‌ సోకినప్పుడు ఆ వైరస్‌ తిష్ఠ వేసి ఉండే శ్వాసకోశ వ్యవస్థలోకి యాంటీ బాడీలు చేరుకోవాలి. అయితే కొన్ని సందర్భాల్లో అలా జరగడం లేదు. అలాగే సాధారణంగా ఏదైనా ఇన్‌ఫెక్షన్‌ సోకినప్పుడు శరీరంలో కొంతమేరకు వ్యాధినిరోధకశక్తి పెరుగుతుంది. అయితే ఆ వ్యాధినిరోధకశక్తి ఎంత బలంగా ఉంది? అంతటి సామర్థ్యాన్ని ఎంత వరకూ కలిగి ఉంటుంది? అనే అంశాల మీద అదే ఇన్‌ఫెక్షన్‌ రెండోసారి సోకే అంశం ఆధారపడి ఉంటుంది. అయితే ఇలా వ్యాధినిరోధకశక్తి తత్వాన్ని అంచనా వేసే వీలు లేదు కాబట్టి, ‘కొవిడ్‌ - 19’ ఇన్‌ఫెక్షన్‌ సోకి, తగ్గిన తర్వాత, రక్తంలో కొవిడ్‌ యాంటీ బాడీలు కనిపించినా రెండోసారి ఆ వైరస్‌ సోకదనే నమ్మకం లేదు. కాబట్టి ముఖానికి మాస్క్‌ ధరించడం, తరచుగా చేతులను శుభ్రం చేసుకోవడం, సామాజిక దూరం పాటించడం లాంటి జాగ్రత్తలు ఎప్పటికీ అనుసరిస్తూనే ఉండాలి అంటున్నారు వైద్యులు.