ఏపీలో పోలీసుల కొరత: బీపీఆర్‌డీ

న్యూఢిల్లీ, డిసెంబరు 29(ఆంధ్రజ్యోతి): ఏపీలో పోలీసుల కొరత ఎక్కువగా ఉన్నట్లు బ్యూరో ఆఫ్‌ పోలీసు రీసెర్చ్‌ అండ్‌ డెవల్‌పమెంట్‌(బీపీఆర్‌డీ) సంస్థ తెలిపింది. లక్ష జనాభాకు 141మంది పోలీసులు ఉండాల్సి ఉండగా.. కేవలం 113.08 మందే ఉన్నారని పేర్కొంది. ఈ మేరకు బీపీఆర్‌డీ కేంద్ర హోంశాఖకు నివేదిక సమర్పించింది. ఈ నివేదిక ప్రకారం.. రాష్ట్రంలో ఐపీఎస్‌ అధికారుల పోస్టులు 144 మంజూరైతే, కేవలం 115 మందే పనిచేస్తున్నారు. రాష్ట్రంలో సివిల్‌, జిల్లా, సాయుధ రిజర్వు, ప్రత్యేక సాయుధ బలగాలు, భారత రిజర్వు బెటాలియన్లకు కలిపి మంజూరైన పోస్టులు 73,894 ఉంటే, ప్రస్తుతం 59,553 మంది మాత్రమే ఉన్నారు. అదనపు ఎస్పీలు, డిప్యూటీ కమాండెంట్లు 91మందికి 72మందే ఉన్నారు. డీఎస్పీలు, అసిస్టెంట్‌ కమాండెంట్లు 45పోస్టులు, ఇన్‌స్పెక్టర్‌ పోస్టులు 55ఖాళీగా ఉన్నాయి. మహిళా పోలీసులు 3,483(3.85ు) మంది మాత్రమే ఉన్నారు.