సబ్బం హరి ఇంటి ప్రహరీ కూల్చివేత

విశాఖపట్నం, అక్టోబరు 3 (ఆంధ్రజ్యోతి): విశాఖలో టీడీపీనేత, మాజీ ఎంపీ సబ్బంహరి ఇంటి ప్రహరీ, మరుగుదొడ్డిని జీవీఎంసీ అధికారులు కూల్చివేశారు. జేసీబీలు, వందలాదిమంది పోలీసులతో సీతమ్మధారలోని ఆయన నివాసం వద్దకు అధికారులు శనివారం తెల్లవారుజాము 3.30 గంటలకు తరలివచ్చారు. సబ్బంహరి తన అభ్యంతరాలను, నిరసనలను వ్యక్తం చేస్తుండగానే.. అక్రమమంటూ కొన్ని నిర్మాణాలను కూల్చేశారు. నాలుగు గంటలకు మొదలైన కూల్చివేతలు ఉదయం పదిగంటల వరకు కొనసాగాయి. అనంతరం ఫెన్సింగ్‌ నాటి, జీవీఎంసీ బోర్డు ఏర్పాటుచేసి వెనుదిరిగారు. ఆక్రమణల తొలగింపులో భాగంగానే సబ్బంహరి నివాస ప్రాంగణంలో ఈ కూల్చివేతలు సాగించినట్టు అధికారులు పేర్కొన్నారు

అయితే, ఈ కూల్చివేతలకు అధికారులు ఎంచుకొన్న సమయం, కూల్చిన తీరుతో ఈ వ్యవహారం రాజకీయవేడి రేపింది. జగన్‌ ప్రభుత్వాన్ని గట్టిగా విమర్శిస్తున్న వారిలో సబ్బంహరి ఒకరు కావడంతో... ఇదంతా ‘కక్ష సాధింపులో భాగమే’ అనే ఆరోపణలు వెల్లువెత్తాయి. 

తెల్లవారుజామున 3.30 గంటల సమయంలో పదుల సంఖ్యలో జీవీఎంసీ టౌన్‌ప్లానింగ్‌ అధికారులు, సిబ్బంది,  పోలీసులు కలిసి జేసీబీ, బాబ్‌కాట్‌తో సీతమ్మధారలోని సబ్బం హరి ఇంటి వద్దకు చేరుకున్నారు.  నాలుగుగంటల సమయంలో కూల్చివేతలు ప్రారంభించారు. ఆ సమయంలో ఇంట్లో హరి నిద్రపోతున్నారు. విషయం తెలిసి బయటకువచ్చారు. తనకు ముందస్తు నోటీసులు ఇవ్వకుండా ఎలా కూల్చుతారని జేసీబీకి అడ్డంగా సబ్బంహరి నిలబడ్డారు. సిబ్బంది ఫెన్సింగ్‌ పోల్స్‌ వేయబోగా, హరి అనుచరులు అడ్డుకున్నారు.