గిగ్‌ వర్కర్ల చట్టం చరిత్రాత్మకం

• సీఎం, మంత్రికి కృతజ్ఞతలు తెలిపిన యూనియన్‌

హైదరాబాద్‌, ఏప్రిల్‌ 5 (ఆంధ్రజ్యోతి): గిగ్‌ వర్కర్ల సంక్షేమం కోసం ప్రత్యేక చట్టాన్ని (తెలంగాణ ప్లాట్‌ఫాం ఆధారిత గిగ్‌ వర్కర్ల బిల్లు- 2026) తీసుకురావడం చరిత్రాత్మకమని గిగ్‌క్ష ప్లాట్‌ఫాం వర్కర్స్‌ యూనియన్‌ ప్రశంసించింది. ఈ సందర్భంగా సీఎం రేవంత్‌రెడ్డి, కార్మిక శాఖ మంత్రి జి.వివేక్‌ వెంకటస్వామిలకు యూనియన్‌ ప్రతినిధిలు కృతజ్ఞతలు తెలిపారు. యూనియన్‌ అధ్యక్షుడు షేక్‌ సలాహుద్దీన్‌ నేతృత్వంలోని బృందం ఆదివారం మంత్రి వివేక్‌ను సోమాజిగూడలోని వారి నివాసంలో కలిసి, ఈ చట్టం లక్షలాది కుటుంబాలకు సామాజిక భద్రత కల్పిస్తుందని పేర్కొంది. ఈ సందర్భంగా మంత్రి వివేక్‌ మాట్లాడుతూ, కాంగ్రెస్‌ ప్రభుత్వం ఎల్లప్పుడూ పేదలు, కార్మికుల పక్షాన నిలుస్తుందని తెలిపారు. దేశ ఆర్థిక వ్యవస్థలో గిగ్‌ వర్కర్ల పాత్ర కీలకమని, వారి సామాజిక భద్రత కోసం ప్రభుత్వం కట్టుబడి ఉందని మంత్రి స్పష్టం చేశారు.