kumaram bheem asifabad- గాలిపటం.. ఇదో లెక్కల మంత్రం

- పండగ వేళ సందడి చేస్తున్న చిన్నారులు

వాంకిడి, జనవరి 12 (ఆంధ్రజ్యోతి): సక్రాంతి పర్వదినం సెలవులొచ్చాయంటే విద్యార్థులకు ఎంతో సంతోషం. ఎక్కడలేని ఆనందం. వారం రోజులు సందడిగా గడపొచ్చన్న భావన, ఈ ఆనందంలో ఇళ్ల ముందే పిల్లలంతా గుమిగూడుతారు. పతంగులు ఎగరేసుకోవాలంటూ అమ్మ దగ్గర కెళ్తారు. రూ. ఐదు కావాలంటారు. పట్టుబట్టి మరీ వసూలు చేస్తారు. తలక్కున మెరిసే పేపర్లతో రెడీ మేడ్‌గా రూపొందించిన గాలిపటం కొనుక్కుని వస్తారు. ఇళ్ల వద్ద ఎగరేస్తుంటారు. నేటి తరానిఇక ఇంతవరకే తెలుసు. నాటి బాలతరం ఇలా చేయలేదు. ఇంటింటికి తిరిగి పాత పత్రికలను అడుక్కొచ్చేవారు. ఇళ్లలో దొరకనప్పుడే కొనుక్కొచ్చేవారు. పతంగి తయారీ కోసం మెదడుకు పదును పెట్టేవారు. ఇదో గణిత సూత్ర మంత్రం అనేంతగా సందడి చేసేవారు. నాడు ఆకాశంలో ఎగిరిన ఆ పతంగుల రూపకల్పన సందడి వెనక... వారు పఠించిన ఆ గణిత మంత్రాలను నేటి తరం ఆచరించాల్సిన అవశ్యకత ఉందని విద్యావేత్తలు అభిప్రాయపడుతున్నారు.

- ఇదో గణిత సూత్రం..

నాటి బాలతరం గణితంలో ఆకారాలు, సూత్రాలను గర్తు చేసుకుంటూ గాలిపటం తయారు చేసేవారు. మొదట పాత పత్రికలను సేకరించేవారు. ఒక పేజీని నాలుగు భుజాలు సమానంగా ఉ ండే (చతురస్రాకారం)లా కత్తిరిస్తారు. ఇళ్లలో కొబ్బరి పుల్లలు చీపుళ్ల నుంచి రెండు తీసుకుంటారు. వాటిలో ఒక దానిని చతురస్రాకారంలో కత్తిరించిన కాగితం మద్యలో భుజాల అభిముఖంగా (కర్ణం) మరో పుల్లను వంచి (అర్థ వ్యాసం) కాగితం మూడు మూలలు కలుపుతూ గంజి లేదా అన్నంతో అంటిస్తారు. వారి అభిరుచిని బట్ట కొన్ని పతంగులకు కాగితం ముక్కల్ని సన్న (దీర్ఘ చతురస్రాకారం)గా కత్తిరించి పొడుగ్గా కొన్నింటికేమో చిన్న (త్రిభుజాకారం)గా తోకనంటిస్తారు. మొత్తంగా గణితంలో ఆకారాలు, వాటి సూత్రాలు పతంగి తయారీ ద్వారా మరోసారి గుర్తు చేసుకునేవారు.

- రూపకల్పనలో సృజనాత్మకత...

- రూపకల్పనలో సృజనాత్మకత గణిత సూత్రాలు ఉన్న గాలిపటాన్ని పైకి ఎగిరించాలంటే దారం అవసరం. ఆరోజుల్లో మీటర్లకొద్ది పొడవుండే దారం కండెలను కొనుక్కొచ్చేవారు. ఆ తర్వాత గాలి పటం బ్యాలెన్స్‌ తప్పకుండా కర్ణం, అర్ద వ్యాసం గల పుల్లకు ఇరువైపులా రంద్రం చేసి దారం లాగి కడతారు. దారం బిగింపులో ఏమాత్రం ఎగుడుతిగుడుగా ఉన్నా.. గాలి పటం ఎగరదు. గాలి పటం ఎగిరేది ఈ దారం కట్టే సృజనాత్మకత పైనే ఆదారపడి ఉంటుందన్నది దీనర్థం.

- స్నేహితుల సహకారం...

ఈ గాలిపటం తయారీకి అవసరమైన కాగితం సేకరణ దగ్గర్నుంచి ఎగరవేసేంత వరకు స్నేహితుల సహాకారం తప్పనసరి. కనీసం ఇద్దరు ముగ్గురి భాగస్వామ్యం ఉంటుంది. గాలిపటాలు కూడా ఒక్కడే ఎగరేయడు. ఒకరు దానిని ఆకాశంలో గద్దలకు పోటీగా ఎగిరేలా గాలి పటానికి అనుగుణంగా దారం చేతుల్లో ఆడిస్తారు. ఇంకొకరు కండేనికి దారం చుడుతూ వదులుతూ ఉంటారు. ఇంకొకరు అది కింద పడకుండా జాగ్రత్తలు, సలహాలు ఇస్తుంటారు. ఇలా రకరకాలుగా ఒకరికొకరు సహాకారం తీసుకుంటుంటారు. గ్రూపు సందడికి ఇది సంకేతం. సమూహంగ ఏర్పడితేనే ఏదైనా సాధన. రూపకల్పన చేయోచ్చనేది ఈ విషయ సారంశం.

- కన్నాలు కట్టడంలో చిట్కాల లెక్కలు

పతంగుకు కన్నాలు కట్టడం అత్యంత కీలకం. ఒక కన్నా పొడవుగా ఉంటే పతంగు ఒక వైపు వంగీపోతుంది. రెండు కన్నాలు సమాన పొడవులో ఉండలి. మధ్య కన్నా కోణం కచ్చితంగా ఉండాలి. ఇది పూర్తిగా కోణాల గణితం. చిన్న తేడా వచ్చినా పతంగు ప్రయాణాన్ని మర్చేస్తుంది. అందుకే పెద్దలు పిల్లలకు కన్నాలు కట్టేటప్పుడు ఓర్పుతో నే ర్పిస్తారు. ఈ ప్రక్రియలో కొలతల ప్రాముఖ్యత వారికి అవగతమవుతోంది.