Hyderabad Metro: త్వరలో మెట్రోకు కొత్త కోచ్‌లు

• 60 బోగీలను తెచ్చేందుకు హెచ్‌ఎంఆర్‌ ఏర్పాట్లు.. మొత్తం పది రైలు సెట్ల కొనుగోలుకు నిర్ణయం

• ఇప్పటికే సర్కారుకు అధికారుల ప్రతిపాదనలు

• అనుమతి వచ్చిన వెంటనే టెండర్ల నిర్వహణ

• రూ.650-700 కోట్ల వరకు వెచ్చించే అవకాశం

హైదరాబాద్‌ సిటీ, జనవరి 18 (ఆంధ్రజ్యోతి): హైదరాబాద్‌ మెట్రోకు త్వరలోనే కొత్త రైళ్లు అందుబాటులోకి రానున్నాయి. పెరుగుతున్న రద్దీని దృష్టిలో ఉంచుకుని 60 బోగీలతో కూడిన పది రైలు సెట్లను తీసుకొచ్చేందుకు ఏర్పాట్లు చేస్తున్నారు. ఇప్పటి వరకు మెట్రో రైళ్లు మూడు కోచ్‌లతో నడుస్తుండగా మరికొద్ది రోజుల్లో 6 బోగీలతో నడిపించనున్నారు. ఈ మేరకు ప్రతిపాదనలను ఇటీవల హైదరాబాద్‌ మెట్రో రైల్‌(హెచ్‌ఎంఆర్‌) అధికారులు ప్రభుత్వానికి పంపించారు. ప్రభుత్వం ఆమోదించిన వెంట నే టెండర్లు నిర్వహించి కొనుగోలు చేస్తామని హెచ్‌ఎంఆర్‌ వర్గాలు చెబుతున్నాయి. ఎల్‌బీనగర్‌-మియాపూర్‌, జేబీఎ్‌స-ఎంజీబీఎస్‌, నాగోల్‌-రాయదుర్గం కారిడార్లలో ప్రస్తుతం రోజుకు 1,200 ట్రిప్పులను నడిపిస్తున్నారు. రోజుకు గరిష్ఠంగా 4.60 లక్షల నుంచి 4.80 లక్షల మంది ప్రయాణిస్తున్నారు. పండుగలు, సెలవు రోజుల్లో ఈ సంఖ్య 5 లక్షలు దాటుతోంది.

కొత్త కోచ్‌లకు నాలుగేళ్లుగా ఎదురుచూపులు

పెరుగుతున్న రద్దీని దృష్టిలో ఉంచుకుని అదనపు బోగీలను తీసుకొస్తామని నాలుగేళ్ల క్రితం ఎల్‌అండ్‌టీ అధికారులు ప్రకటించారు. ఏడాదిలోపు 4 నుంచి 7 కొత్త రైళ్లను (మూడు కోచ్‌లతో) కచ్చితంగా తీసుకొచ్చి ప్రయాణికులకు అందుబాటులో ఉంచుతామని ఎల్‌అండ్‌టీ ఎండీ కేవీబీ రెడ్డి 2024 నవంబరులో చెప్పారు. కొత్త రైళ్ల కొనుగోలు సాధ్యపడకుంటే కనీసం 40-70 వరకు కోచ్‌లనైనా తీసుకొచ్చి అందుబాటులో ఉంచుతామని ఏడాది క్రితం చెప్పారు. ఇప్పటి వరకు అమలు కాలేదు. దీంతో ప్రయాణికులు తీవ్ర ఇబ్బందులు పడుతున్నారు. ప్రధానంగా ఉదయం 8 నుంచి 11 గంటల వరకు, సాయంత్రం 5 నుంచి రాత్రి 9.30 గంటల వరకు మెట్రోలో కాలుపెట్టలేని పరిస్థితి ఉంటోంది. కాగా, నష్టాలతో సతమతమవుతున్న ఎల్‌అండ్‌టీ.. మెట్రో నిర్వహణ బాధ్యతల నుంచి తప్పుకుంటామని కొన్ని నెలల క్రితం ప్రకటించింది. దీంతో ఎల్‌అండ్‌టీ నుంచి మెట్రోను తీసుకునేందుకు రాష్ట్ర ప్రభుత్వం అంగీకరించింది. ఈ మేరకు మెట్రో యాజమాన్య బదిలీ ప్రక్రియను శరవేగంగా చేపడుతోంది. కాగా, ఫైనాన్షియల్‌ కన్సల్టెంట్‌ నివేదిక మరో పది రోజుల్లో పూర్తవుతుందని, అయితే స్వాధీన ప్రక్రియకు సమాంతరంగా కొత్త రైళ్లను కొనుగోలు చేయనున్నట్లు ఓ అధికారి తెలిపారు.

తయారీ సంస్థలతో సంప్రదింపులు

నగరంలో మొదటి దశలో నడుస్తున్న రైళ్లు ప్రస్తుతం 57 ఉన్నాయి. 171 కోచ్‌లతో కూడిన ఆయా రైళ్లు మూడు కారిడార్లలో తిరుగుతున్నాయి. అయితే 6 బోగీలతో కూడిన రైళ్లు నిలిచేలా మొదట్లోనే ప్లాట్‌ఫామ్‌లను నిర్మించడంతో ఇప్పుడు ఆ మాదిరి కొత్త సెట్లను తీసుకొచ్చేందుకు ఏర్పాట్లు చేస్తున్నారు. మొత్తం 10 కొత్త రైళ్లను(60 బోగీలు) అందుబాటులోకి తీసుకురానున్నారు. ఈ మేరకు బెంగళూరులోని భారత్‌ ఎర్త్‌మూవర్స్‌ లిమిటెడ్‌(బీఈఎంల్‌), చెన్నైలోని ఇంటిగ్రల్‌ కోచ్‌ ఫ్యాక్టరీ(ఐసీఎఫ్‌), తదితర సంస్థలను హెచ్‌ఎంఆర్‌ అధికారులు సంప్రదించారు. కాగా, 6 బోగీలతో కూడిన ఒక్కో సెట్‌కు సుమారు రూ.65-70 కోట్ల వరకు ఖర్చవుతుండగా.. 10 కొత్త రైళ్లకు రూ.650-700 కోట్ల వరకు వెచ్చించాల్సి ఉంటుంది.

రుణాలు ఇచ్చే సంస్థల కోసం అన్వేషణ

ఎల్‌అండ్‌టీ నుంచి మెట్రోను స్వాధీనం చేసుకునే ప్రక్రియను వేగంగా పూర్తి చేస్తున్న రాష్ట్ర ప్రభుత్వం ఇదే క్రమంలో ఆ సంస్థకు ఇచ్చే ఈక్విటీ వాటా రూ.2వేల కోట్లతో పాటు రుణాల కింద ఉన్న రూ.13వేల కోట్లను తక్కువ వడ్డీ తీసుకునేందుకు ప్రయత్నిస్తోంది. ఈ మేరకు కేంద్ర ప్రభుత్వ సహకారంతో ప్రపంచ బ్యాంకులను సంప్రదిస్తోంది. తక్కువ వడ్డీతో రుణాలను తీసుకుని వాటిని సులువుగా చెల్లిస్తూ మెట్రోను సమర్థంగా నిర్వహించేందుకు చర్యలు తీసుకుంటోంది. మొత్తంగా నగర రవాణాలో అతి కీలకమైన మెట్రోకు కొత్త రైళ్లను తీసుకొచ్చేందుకు ఏర్పాట్లు చేస్తోంది.