హైకోర్టు డివిజన్‌ బెంచ్‌లో సుశీ ఇన్‌ఫ్రాకు దక్కని ఊరట

హైదరాబాద్‌, అక్టోబరు 15 (ఆంధ్రజ్యోతి): రేడియల్‌ రోడ్డు ప్యాకేజ్‌-2 పనుల టెండర్‌ వివాదంలో కాంగ్రెస్‌ ఎమ్మెల్యే కోమటిరెడ్డి రాజగోపాల్‌రెడ్డి కుటుంబ సభ్యులకు చెందిన సుశీ ఇన్‌ఫ్రాకు హైకోర్టు డివిజన్‌ బెంచ్‌లోనూ ఊరట లభించలేదు. కొత్వాల్‌గూడ (బుద్వేల్‌) నుంచి నేషనల్‌ హైవే 167ఎన్‌ (నాచారం, కోస్గి/కొడంగల్‌) వరకు 81 కిలోమీటర్ల మేర నిర్మించతలపెట్టిన రేడియల్‌ రోడ్డు టెండర్లపై ఆ సంస్థ కోర్టును ఆశ్రయించింది. తమ టెక్నికల్‌ బి డ్‌పై అనర్హత వేటు వేయడం చెల్లదంటూ తొలుత హైకోర్టు సింగిల్‌ జడ్జి వద్ద పిటిషన్‌ దాఖలు చేసింది. విజయవంతమైన బిడ్డర్‌ (ఎల్‌-1) వాదన కూడా వింటామని ఆ జడ్జి తెలిపారు. జడ్జి నిర్ణయాన్ని సవాలు చేస్తూ సుశీ ఇన్‌ఫ్రా డివిజన్‌ బెంచ్‌లో అప్పీల్‌ దాఖలు చేసింది. ఆ అప్పీల్‌పై తాత్కాలిక ప్రధాన న్యాయమూర్తి జస్టిస్‌ శాంకోషీ, జస్టిస్‌ చలపతిరావుల ధర్మాసనం గురువారం విచారణ జరిపింది. సింగిల్‌ జడ్జి నిర్ణయంలో జోక్యం చేసుకోలేమని తెలిపింది. ఎల్‌-1 బిడ్డర్‌ను ఇంప్లీడ్‌ చేసి సింగిల్‌ జడ్జి వద్దే వివాదాన్ని తేల్చుకోవాలని సూచించింది.