వంటగది అందంగా..!

ఉన్న కొద్దిపాటి స్థలాన్ని, అరలను తెలివిగా ఉపయోగించుకుంటూ వంటకి అనువుగా ఉండేలా, రిచ్‌ లుక్‌ వచ్చేలా వంటగదిని ఇలా సర్దుకోవాలి.

• వంటగది ప్లాట్‌ఫామ్‌ను డబ్బాలు, పాత్రలు, ఇతర సామాన్లతో నింపకూడదు. దాని మీద వంటకు కావాల్సిన వాటిని మాత్రమే ఉంచుకోవాలి. వంట పూర్తయిన తరువాత వాటిని గోడకు అమర్చిన అరల్లో చక్కగా సర్దేయాలి.

• మిక్సీ, ఓవెన్‌, టోస్టర్‌ తదితర ఎలక్ట్రికల్‌ సామాన్లను అవసరమైనప్పుడు వాడుకుని ఆపైన అరల్లో పెట్టేయాలి. వాటిమీద దుమ్మ పడకుండా జాగ్రత్తలు తీసుకోవాలి.

• పాత్రలు, పళ్లాలు ఎక్కువగా ఉంటే వాటిని పొడిగా తుడిచి పెద్దదానిలో చిన్నది పట్టేలా అమర్చి చివరి అరలో సర్ది పెట్టాలి. రోజూ వాడే వాటిని ఒక పక్క, అప్పుడప్పుడు వాడేవాటిని మరో పక్క పెట్టుకుంటే బాగుంటుంది. అలాగే ఖాళీ డబ్బాలు, వాటి మూతలను ఓ పక్కగా ఉంచుకోవాలి. అరల సైజుకు తగ్గట్టు స్టోరేజ్‌ బ్యాస్కెట్లను తెచ్చుకుని వాటిలో టీ, కాఫీ, మసాలా పొడుల ప్యాకెట్లతో పాటు వంటకు కావాల్సిన ఇతర దినుసుల ప్యాకెట్లను సర్ది పై అరల్లో ఉంచుకుంటే తీసుకోవడానికి వీలుగా ఉంటుంది.