నోరూరించే చేపల కూరలు

రుచికి రుచి, ఆరోగ్యానికి ఆరోగ్యం... చేపల వంటకాలు. అయితే చేప రకాన్ని బట్టి వండే విధానం కూడా విభిన్నంగా ఉండాలి. అప్పుడే చేపల వంటకం రుచి అమోఘంగా ఉంటుంది. వేర్వేరు చేపలతో వండే వీలున్న వేర్వేరు వంటకాలు ఈ వారం మీకోసం...

వంజరం వేపుడు

కావలసిన పదార్థాలు:

కరివేపాకు - 2 రెమ్మలు

నెయ్యి లేదా నూనె - 2 టేబుల్‌ స్పూన్లు

చేప ముక్కలు - పావు కిలో

అల్లంవెల్లుల్లి పేస్ట్‌ - 1 టీస్పూను

పసుపు, ఉప్పు - తగినంత

నిమ్మరసం - అర చెక్క

కారం - అర టీస్పూను

గరం మసాలా - అర టీస్పూను

తయారీ విధానం:

• పైన చెప్పిన పదార్థాలన్నీ ఓ గిన్నెలో వేసి, వాటిలో చేప ముక్కలు నానబెట్టాలి

• బాండీలో నూనె వేడిచేసి, ముందుగా కరివేపాకు వేయించి, తర్వాత చేప ముక్కలు వేయాలి

• చిన్న మంట మీద మూత ఉంచి చేప ముక్కలు మగ్గించుకోవాలి

• రెండు వైపులా సమంగా వేగేలా గరిటతో తిప్పుతూ ఉండాలి

• ఇలా పది నిమిషాల్లో చేప ముక్కలు పూర్తిగా ఉడికిపోతాయి

• తర్వాత వేడిగా వడ్డించాలి.

బొమ్మిడాయల ఇగురు

కావలసిన పదార్థాలు:

చేప ముక్కలు - 12

ఉప్పు - తగినంత

నూనె - 4 టేబుల్‌ స్పూన్లు

ఉల్లి ముక్కలు - 1 కప్పు

పచ్చిమిర్చి - 5

పసుపు - అర టీస్పూను

కారం - 2 టీస్పూన్లు

ధనియాల పొడి - 2 టే.స్పూన్లు

అల్లం వెల్లుల్లి పేస్ట్‌ - 1 టీస్పూను

కొబ్బరి పేస్ట్‌ - అర కప్పు

గరం మాసాలా - 1 టీస్పూను

కొత్తిమీర - కొద్దిగా

నీళ్లు - 3 కప్పులు

తయారీ విధానం:

• ఒక వెడల్పాటి గిన్నెలో చేప ముక్కలు, ఉప్పు, పసుపు, కారం, అల్లంవెల్లుల్లి ముద్ద, గరం మసాలా, ఉల్లి ముక్కలు, పచ్చిమిర్చి వేసి కలిపి పక్కనుంచాలి

• మందపాటి గిన్నెలో నూనె పోసి, మరిగిన తర్వాత చేప ముక్కల మిశ్రమం వేసి కలుపుకోవాలి

• పావు గంట పాటు చిన్న మంట మీద మూత పెట్టి చేప ముక్కలను మగ్గించుకోవాలి

• తర్వాత కొబ్బరి పేస్ట్‌, కొత్తిమీర, నీళ్లు వేసి నెమ్మదిగా కలపాలి

• మూత ఉంచి చిన్న మంట మీద 15 - 20 నిమిషాలపాటు కూర చిక్కబడేవరకూ ఉడికించి వేడిగా వడ్డించాలి.

సొర చేప పిట్టు

కావలసిన పదార్థాలు:

సొర చేపలు - 2

ఉల్లి ముక్కలు - 1 కప్పు

పచ్చిమిర్చి - 4

ఆవాలు, మినప్పప్పు - చెరొక స్పూను

జీలకర్ర - 1 టీస్పూను

అల్లం వెల్లుల్లి పేస్ట్‌ - 2 టీస్పూన్లు

గరం మసాలా - 1 టీస్పూను

పసుపు - 1 టీస్పూను

ఉప్పు - తగినంత

కొత్తిమీర - 1 కట్ట

నూనె - 2 టే.స్పూన్లు

తయారీ విధానం:

• గిన్నెలో చేప ముక్కలు, ఉప్పు, పసుపు, చేపలు మునిగేటన్ని నీళ్లు పోసి 10 నిమిషాలు ఉడికించాలి

• ఉడికిన తర్వాత ముక్కలు చిదిమి పక్కనుంచాలి

• బాండీలో నూనె పోసి మినప్పప్పు, ఆవాలు, జీలకర్ర వేసి వేయించాలి

• తర్వాత ఉల్లి ముక్కలు, పచ్చిమిర్చి వేసి వేయించాలి

• తర్వాత అల్లంవెల్లుల్లి పేస్ట్‌ వేసి పచ్చివాసన పోయేవరకూ వేయించాలి

• పసుపు, గరం మసాలా, ఉప్పు వేసి కలపాలి.

• తర్వాత కొత్తిమీర తరుగు వేసి కలిపి చేప పొడి వేయాలి.

• బాగా కలిపి చిన్న మంట మీద 5 నిమిషాలు మగ్గనివ్వాలి.