బఠాణీలు తిందాం..!

బఠాణీలను కొద్దిగా వేయించుకుని తినడం వల్ల శరీరానికి తక్షణ శక్తి లభించడంతోపాటు మరెన్నో ఆరోగ్య ప్రయోజనాలు చేకూరుతాయి.

• రోజూ గుప్పెడు బఠాణీలను తింటే చాలు.. శరీరానికి అవసరమైన పీచు, ప్రొటీన్లు లభిస్తాయి. ఇవి కండరాల నిర్మాణానికి తోడ్పడతాయి. కడుపు నిండిన భావన కలిగి అతిగా తినాలనే కోరిక తగ్గుతుంది. శరీర బరువు నియంత్రణలో ఉంటుంది. రోగనిరోధక శక్తి పెరుగుతుంది.

• ఉదయం లేదా సాయంత్రం వేళల్లో బఠాణీలు తినడం వల్ల వాటిలోని ఐరన్‌, ఫోలేట్లు కలిసి రక్తంలో హెమోగ్లోబిన్‌ శాతాన్ని పెంచుతాయి. దీంతో అలసట, నీరసం, ఒత్తిడి తగ్గి ఉత్సాహంగా అనిపిస్తుంది.

• బఠాణీల్లో ఉండే జింక్‌, మెగ్నీషియం, కాల్షియం, పొటాషియం, పాస్ఫరస్‌ తదితర ఖనిజాలు; ఎ, బి, సి, కె విటమిన్లు.. ఎముకల దృఢత్వానికి, హార్మోన్ల సమతుల్యతకూ ఉపకరిస్తాయి.

• వేయించిన బఠానీలను స్నాక్స్‌లా తీసుకుంటే జీర్ణక్రియ మెరుగుపడుతుంది. మలబద్దకం సమస్య తీరుతుంది.

• బఠాణీల్లో చెడు కొలెస్ట్రాల్‌ ఉండదు. వీటి గ్లైసెమిక్‌ ఇండెక్స్‌ కూడా చాలా తక్కువ. కాబట్టి రక్తంలో చక్కెర స్థాయిలు, రక్తపోటు అదుపులో ఉంటాయి. గుండె ఆరోగ్యంగా పనిచేస్తుంది.