అందమైన మెడ కోసం...

ఒక్కోసారి మెడ ముందు వెనక భాగాల్లో చర్మం వదులుగా మారి ముడతలు, గీతలు ఏర్పడి అందవిహీనంగా కనిపిస్తుంటాయి. వీటిని సులువుగా మాయం చేసే చిట్కాల గురించి తెలుసుకుందాం...

• ముందుగా మెడ భాగాలను గోరువెచ్చటి నీటితో ఆపైన క్లెన్సర్‌తో శుభ్రం చేసుకోవాలి. చిన్న గిన్నెలో అయిదు చెంచాల ఆలివ్‌ ఆయిల్‌ను తీసుకుని గోరువెచ్చగా వేడిచేయాలి. ఈ నూనెను మునివేళ్లతో కొద్దికొద్దిగా తీసుకుంటూ మెడకు పట్టించి గుండ్రంగా రుద్దుతూ పావుగంట సేపు మర్దన చేయాలి. దీనివల్ల అక్కడి చర్మం తేమతో నిండి బిగుతుగా మారుతుంది. ముడతలు, గీతలు మాయమై మెడ అందంగా మారుతుంది.

• తరచూ మెడను ఇరు పక్కలకూ, ముందుకూ, వెనక్కూ వంచుతూ చిన్న చిన్న వ్యాయామాలు చేస్తూ ఉండాలి. ఇలా చేయడం వల్ల చర్మ కణాలు ఉత్తేజితమై కొల్లాజెన్‌ ఉత్పత్తి పెరుగుతుంది. దీంతో మెడ చర్మం బిగుతుగా మారుతుంది.

• రక్తప్రసరణ సజావుగా జరగడం వల్ల మెడ ఛాయగా కనిపిస్తుంది.

• ఒక గిన్నెలో కోడిగుడ్డు తెల్ల సొన, రెండు చెంచాల తేనె వేసి బాగా కలపాలి. ఈ మిశ్రమాన్ని మెడకు ప్యాక్‌లా పట్టించి పావుగంట సేపు ఆరనివ్వాలి. ఆపైన గోరువెచ్చటి నీటితో శుభ్రం చేసుకోవాలి. ఇలా వారానికి రెండుసార్లు చేస్తూ ఉంటే మెడ అందంగా కాంతివంతంగా మారుతుంది.

• చిన్న గిన్నెలో రెండు చెంచాల పెరుగు, చెంచా నిమ్మరసం వేసి బాగా కలపాలి. ఈ మిశ్రమాన్ని చూపుడు వేలితో తీసుకుంటూ మెడ భాగాల మీద నెమ్మదిగా మర్దన చేయాలి. ఆపైన గోరువెచ్చటి నీటితో శుభ్రం చేసుకోవాలి. ఇలా రోజూ చేస్తూ ఉంటే మంచి ఫలితం కనిపిస్తుంది.

• చిన్న గిన్నెలో రెండు చెంచాల కలబంద గుజ్జు, రెండు చెంచాల తేనె వేసి బాగా కలపాలి. ఈ మిశ్రమాన్ని రాత్రి పడుకునేముందు మెడ భాగాలకు ప్యాక్‌లా వేయాలి. ఉదయాన్నే గోరువెచ్చటి నీటితో కడిగేసుకుంటే చాలు. నాలుగు రోజుల్లో ముడతలు తగ్గి మెడ అందంగా

• మెరిసిపోతుంది.