రక్తపోటును తగ్గించేవి ఇవే

అధిక రక్తపోటును నియంత్రించేందుకు తోడ్పడే పోషకాహారం వివరాలు...

• ఉప్పు, సోడియం ఎక్కువగా ఉండే ఆహారాన్ని తగ్గించాలి. పొటాషియం, మెగ్నీషియం, పీచు అధికంగా ఉండే వాటిని భోజనంలో చేర్చుకోవాలి.

• తాజా పండ్లు, ఆకుకూరలు, కూరగాయలను రోజూ తీసుకోవాలి. పాలకూర, తోటకూర, మెంతికూరతోపాటు క్యారెట్‌, టమాటా, బీరకాయ, సొరకాయ, బెండకాయలతో తయారుచేసిన వంటకాలను తరచూ తింటుండాలి. వంటకాల్లో ఉప్పు, నూనెలను తగు మాత్రమే వినియోగించాలి.

• అరటి, నారింజ, బొప్పాయి, జామ, యాపిల్‌ పండ్లను రోజూ తినాలి. వీటి ద్వారా శరీరానికి అవసరమైన పీచు, విటమిన్లు, ఖనిజాలు లభిస్తాయి.

• పెసలు, కందిపప్పు, శనగలు, రాజ్మా, అలసందలు లాంటి పప్పు ధాన్యాలను మార్చి మార్చి భోజనంలో చేర్చుకోవాలి. వీటిద్వారా లభించే ప్రోటీన్లు శరీరానికి శక్తిని అందిస్తాయి.

• అన్న తినడం పూర్తిగా మానేయకూడదు. మితంగా తినవచ్చు. ఓట్స్‌, బ్రౌన్‌ రైస్‌, గోధుమలు, రాగులు, సజ్జలు, జొన్నలు తదితరాలను అలవాటు చేసుకోవడం మంచిది.

• పరిమిత మోతాదులో బాదం, వాల్‌నట్స్‌, అవిసె గింజలు, చియా సీడ్స్‌ను తీసుకోవచ్చు. వీటిని నానబెట్టి తినడం ఉత్తమం.