కొత్తగా మొక్కలు నాటారా..?

నర్సరీ నుంచి తెచ్చిన మొక్కలను కుండీలో నాటిన తరువాత అవి కొత్త మట్టికి అలవాటు పడేందుకు, వేర్లు స్థిరపడేందుకు కాస్త సమయం పడుతుంది. ఈ లోపు మొక్కలను తరచూ పరిశీలిస్తూ సంరక్షించాలి.

మొక్కను నాటిన తరువాత మట్టి తేమగా ఉండేలా నీటిని చిలకరిస్తే చాలు. ఎక్కువగా నీటిని అందిస్తే వేర్లకు గాలి అందక మొక్క వాడిపోతుంది. మట్టి తడిసిన తరువాత అదనంగా ఉన్న నీరు సులువుగా బయటికి వెళ్లేలా కుండీల అడుగున రంధ్రాలు చేయాలి.

మొక్కలను నాటిన వెంటనే కుండీలను ఎండలో ఉంచకూడదు. కొద్దిగా వెలుతురు సోకితే చాలు ఆ మొక్కలు చక్కగా పెరుగుతాయి. మొక్క స్వభావాన్ని అనుసరించి వాటికి ఉదయం పూట వచ్చే లేత ఎండ తగిలేలా లేదా నీడ ఉండేలా చూసుకోవాలి.

మొక్కను నాటిన రెండు లేదా మూడు రోజులకే ఎరువులు వేయాలంటూ దాని చుట్టూ మట్టిని తవ్వకూడదు. అలాచేస్తే వేర్లపై ఒత్తిడి పడి మొక్క వంగిపోవచ్చు.

కాండం మీద ఆకులపై పురుగులు కనిపించకపోయినా పురుగుమందులు పిచికారీ చేయకూడదు.

మొక్కలను నాటిన తరువాత రెండు లేదా మూడు రోజుల వరకూ వాటిని అలాగే వదిలివేయడం మంచిది. తరువాత పసుపు రంగులోకి మారిన ఆకులను ఎండిన కొమ్మలను జాగ్రత్తగా కత్తిరించాలి.