గేట్‌-2026 ఫలితాల విడుదల

• ఫిబ్రవరిలో జరిగిన పరీక్షల ఫలితాలను

• వెల్లడించిన ఐఐటీ గువాహటి

• అభ్యర్థులు 27 నుంచి స్కోర్‌కార్డుల డౌన్‌లోడ్‌ చేసుకోవచ్చు

న్యూఢిల్లీ, మార్చి 19: గ్రాడ్యుయేట్‌ ఆప్టిట్యూడ్‌ టెస్ట్‌ ఇన్‌ ఇంజనీరింగ్‌ (గేట్‌) 2026 ఫలితాలు వెల్లడయ్యాయి. దేశవ్యాప్తంగా ఫిబ్రవరి 7, 8, 14, 15 తేదీల్లో గేట్‌ పరీక్షలు జరిగాయి. ఐఐటీ గువాహటి ఆధ్వర్యంలో నిర్వహించిన ఈ పరీక్షల ఫలితాలను గురువారం వెల్లడించారు. దీంతో లక్షలాది మంది ఇంజనీరింగ్‌ అభ్యర్థుల ఉత్కంఠకు తెరదించినట్లయింది. అభ్యర్థులు జీవోఏపీఎస్‌ పోర్టల్‌లో లాగిన్‌ అయి, వారు సాధించిన మార్కులు, ఆలిండియా ర్యాంకు, వారికి సంబంధించిన పేపర్‌లో అర్హత స్థితిని తెలుసుకోవచ్చు. స్కోర్‌ కార్డులు ఈ నెల 27 నుంచి అందుబాటులో ఉంటాయని.. అర్హత సాధించిన అభ్యర్థులు నిర్దేశిత గడువులోపు తమ స్కోర్‌ కార్డులను డౌన్‌లోడ్‌ చేసుకోవాలని పరీక్ష నిర్వాహకులు తెలిపారు. గేట్‌-2026 స్కోర్‌ కార్డులు మూడేళ్ల పాటు చెల్లుబాటు అవుతాయి. వాటి ఆధారంగా అభ్యర్థులు పీజీ ప్రవేశాలు, ఉద్యోగ దరఖాస్తులు చేసుకోవచ్చు. గేట్‌లో సాధించిన స్కోరు ఆధారంగా ప్రభుత్వరంగ సంస్థలు ఇంజనీరింగ్‌ అభ్యర్థులను కొలువులకు ఎంపిక చేసుకుంటాయి.