మరో ‘క్విట్‌ ఇండియా’!

అదానీ, అంబానీల ఆదేశాల మేరకు పనిచేస్తూ, అమెరికా అధ్యక్షుడి బెదిరింపులకు తలొగ్గుతున్న మోదీ ప్రభుత్వ దాడుల వల్ల భారతదేశ గుర్తింపు, ప్రజాస్వామ్యం, రాజ్యాంగం ప్రమాదంలో పడ్డాయి. ఆహారం, గృహవసతి, ఆరోగ్యం, ఉపాధి వంటివి అందనివిగా మారుతున్నాయి. విద్య, ప్రజాస్వామ్య హక్కులు, చట్టబద్ధమైన ప్రభుత్వం, చివరికి ఒక స్వతంత్ర దేశంలోని స్వేచ్ఛా పౌరుడికి చిహ్నంగా భావించే మానవ హక్కులను కూడా మోదీ ప్రభుత్వం లక్ష్యంగా చేసుకుంది. రైతుల ఆదాయాన్ని రెట్టింపు చేస్తామని వాగ్దానం చేసి, వ్యవసాయాన్ని నాశనం చేశారు. కార్మికులకు మెరుగైన భవిష్యత్తుపై కలలు కల్పించి, నాలుగు కార్మిక చట్టాలతో వారిని బంధించారు. వ్యవసాయ కార్మికులతో సహా గ్రామీణ కార్మికులు ఇప్పటికే ఎదుర్కొంటున్న దయనీయమైన దుస్థితిని మరింత దిగజార్చారు. భవిష్యత్తులో చైతన్యవంతమైన పౌరులను తయారుచేసే విశ్వవిద్యాలయాలను, ఊపిరాడకుండా చేశారు.

గాంధీ, అంబేడ్కర్, భగత్‌సింగ్‌ల పోరాటాల ద్వారా సాధించిన భారతదేశాన్ని మనం కాపాడుకోవాలన్నా, వారి కలలకు తగినట్లుగా దానిని తీర్చిదిద్దాలన్నా, వారు చూపిన ‘బ్రిటిష్ వాసులారా, భారతదేశాన్ని విడిచిపెట్టండి!’ అనే క్విట్‌ ఇండియా పోరాట మార్గాన్ని మనం కూడా అనుసరించాలి. దేశ కార్మిక, రైతు సంఘాలు తమ పోరాటం తదుపరి దశలో భాగంగా, స్వాతంత్ర్య పోరాటంలో ముఖ్యమైన రోజు అయిన ఆగస్టు ౯ క్విట్ ఇండియా ఉద్యమాన్ని వర్తమాన పరిస్థితులకు అనుగుణంగా మరోసారి జరపాలని పిలుపునిచ్చాయి. ఆ రోజు ఆదివారం కావడంతో, దీనిని ఆగస్టు 10న నిర్వహిస్తున్నారు. జూలై 28, 29 తేదీలలో ఢిల్లీలో సంయుక్త కిసాన్ మోర్చా, జాయింట్ ప్లాట్‌ఫామ్ ఆఫ్ ట్రేడ్ యూనియన్స్ నిర్వహించిన సమావేశాలలో ఇచ్చిన పిలుపు మేరకు, ఆగస్టు 10న కశ్మీర్ నుంచి కన్యాకుమారి వరకు యావత్ దేశం ‘అదానీ, అంబానీ ఏజెంట్లు, అమెరికాకు భయపడేవారు, దేశాన్ని విభజించేవారందరూ క్విట్ ఇండియా’ అనే నినాదంతో మారుమ్రోగనుంది. సంకోచాన్ని వీడి మీ ఇళ్లు, దుకాణాల నుంచి బయటకు వచ్చి, విధ్వంసం సృష్టించే నియంతలు, నిజాయితీ లేని వ్యక్తులతో పోరాడాల్సిన సమయం ఇది.

- మూడ్ శోభన్ (తెలంగాణ రైతు సంఘం)