రొమ్ము క్యాన్సర్ వ్యథను ఏఐ తీర్చగలదా?

మన దేశంలో రొమ్ము క్యాన్సర్ ఒక ప్రధాన ప్రజారోగ్య సవాలు. ఈ వ్యాధి వల్ల కలిగే ప్రాణనష్టాన్ని తగ్గించడానికి మనకు ఉన్న ముఖ్యమైన అవకాశాల్లో ఒకటి– దీనిని ముందుగానే గుర్తించడం. ఆర్టిఫిషియల్ ఇంటెలిజెన్స్ (ఏఐ) రొమ్ము క్యాన్సర్ గుర్తింపులో కొత్త అవకాశాలను తెరుస్తోంది. మమోగ్రామ్‌‌లు, ఇతర రొమ్ము ఇమేజింగ్ పరీక్షలను విశ్లేషించి, సూక్ష్మమైన అసాధారణతలను గుర్తించడంలో, అనుమానాస్పద పరీక్షలకు ప్రాధాన్యం ఇవ్వడంలో ఏఐ వ్యవస్థలు రేడియాలజిస్టులకు సహాయపడతాయి.

ఏఐ– ఆరోగ్య నిపుణుల సామర్థ్యాన్ని పెంచాలి, కానీ వారి స్థానాన్ని భర్తీ చేయకూడదు. అనుమానాస్పద ఫలితాలకు ఇంకా వైద్యపరమైన పరిశీలన, అవసరమైన ఇమేజింగ్ పరీక్షలు, కణజాల పరీక్ష (బయాప్సీ) ద్వారా నిర్ధారణ అవసరం. అయితే పరిమితంగా ఉన్న నిపుణుల సేవలను లక్షలాది మహిళలకు అందుబాటులోకి తీసుకురావడమే ప్రధానం. భారతదేశంలో లక్షలాది మహిళలకు ఈ ముందస్తు గుర్తింపు సేవలను ఎలా చేరవేయాలన్నదే అసలు ప్రశ్న.

వయసు రీత్యా, ప్రమాదకర స్థాయి అనారోగ్యంలో ఉన్న మహిళలకు, అవసరమైన మౌలిక సదుపాయాలు, నైపుణ్యం, తదుపరి పరీక్షలు, చికిత్సకు సంబంధించిన వ్యవస్థలు ఉన్నచోట క్రమబద్ధమైన మమోగ్రఫీ స్క్రీనింగ్‌కు ముఖ్యమైన పాత్ర ఉంది. అయితే, స్క్రీనింగ్ విజయవంతం కావాలంటే శిక్షణ పొందిన సిబ్బంది, నాణ్యత నియంత్రణ, ఫలితాల విశ్లేషణ, నిర్ధారణ పరీక్షలు, సకాలంలో చికిత్స అందించడం వంటివి అవసరం. మమోగ్రఫీ సౌకర్యాలు సులభంగా అందుబాటులో లేని గ్రామీణ భారతదేశంలో శిక్షణ పొందిన ఆరోగ్య కార్యకర్తలు నిర్వహించే క్లినికల్ బ్రెస్ట్ ఎగ్జామినేషన్ (సీబీఈ– వైద్యపరమైన రొమ్ము పరీక్ష) ద్వారా ముందస్తు గుర్తింపు, తదుపరి పరీక్షలకు పంపించే అవకాశం ఉంటుంది.

తెలంగాణ, ఆంధ్రప్రదేశ్‌లలో మా అనుభవం, రొమ్ము క్యాన్సర్‌ ముందస్తు గుర్తింపును ప్రజల వద్దకు తీసుకెళితే ఏం సాధ్యమవుతుందో చూపించింది. 2012–16 మధ్య 3,750 మంది శిక్షణ పొందిన ఆరోగ్య కార్యకర్తల ద్వారా, 4,000 గ్రామాల్లోని 2 లక్షల మందికి పైగా ఆర్థికంగా వెనుకబడిన మహిళలకు సీబీఈ నిర్వహించాం. ఇది జాతీయ ఆరోగ్య మిషన్ కింద రొమ్ము క్యాన్సర్ స్క్రీనింగ్ వ్యూహంగా సీబీఈను దేశవ్యాప్తంగా స్వీకరించేందుకు తోడ్పడింది.

మమోగ్రామ్‌‌ల విశ్లేషణ, అసాధారణ ఫలితాల ప్రాధాన్యతా క్రమాన్ని నిర్ణయించడం, ఇంకా పరీక్ష అవసరమయ్యే మహిళలను గుర్తించడం వంటి స్క్రీనింగ్ ప్రక్రియలోని అనేక దశలకు ఏఐ తోడ్పడుతుంది. కొన్ని దేశాల్లో రేడియాలజిస్టులతో కలిసి మమోగ్రామ్‌‌లను రెండోసారి పరిశీలించే సాధనంగా ఏఐను ఉపయోగిస్తున్నారు. రేడియాలజిస్టుల నైపుణ్యానికి తోడ్పడటమే ఏఐ పాత్ర, వారి స్థానాన్ని భర్తీ చేయడం కాదు. పెద్ద సంఖ్యలో చిత్రాలను విశ్లేషించగల నిపుణుల కొరతను కొంతవరకు అధిగమించేందుకు ఇది సహాయపడుతుంది.

సాంకేతికత ఈ ప్రక్రియలో ఒక భాగం మాత్రమే. ప్రాథమిక ఆరోగ్య సేవలను నిర్ధారణ కేంద్రాలతో అనుసంధానించే స్పష్టమైన రిఫరల్ వ్యవస్థలు అవసరం. బయాప్సీ, పాథాలజీ, శస్త్రచికిత్స, ఔషధ చికిత్స, రేడియోథెరపీ వంటి సేవలు మహిళలకు అందుబాటులో ఉండాలి. జ్ఞానాన్ని ప్రజలకు చేరవేయడం, ఆరోగ్య విద్య ద్వారా అవగాహన కల్పించడం, మహిళలు అడిగే ప్రశ్నలకు సులభంగా అర్థమయ్యే సమాచారం అందించడం ఏఐ ద్వారా జరగాల్సిన పనులు.

ఆరోగ్య విద్యను కొత్త సాంకేతికత ఎలా మార్చగలదో ఈ ఏడాది జూన్ 11న ప్రదర్శితమైంది. ఈ వినూత్న కార్యక్రమం గిన్నిస్ వరల్డ్ రికార్డును సాధించింది. ఇది NARI (National Awareness & Resource Initiative for Breast Health) అభివృద్ధికి ప్రేరణనిచ్చింది.

https://nariai.in/ వెబ్‌సైట్‌ను సందర్శించడం ద్వారా, ఇంటర్నెట్ సౌకర్యం ఉన్న ఎవరైనా, ఎక్కడి నుంచైనా, ఎప్పుడైనా రొమ్ము ఆరోగ్యానికి సంబంధించిన అనేక అంశాలపై ప్రశ్నలు అడిగి, పలు భాషల్లో సమాధానాలు పొందవచ్చు. ఇది ఏఐ వైద్యుడు కాదు. వైద్య సంప్రదింపునకు ప్రత్యామ్నాయం కాదు. వ్యాధిని నిర్ధారించదు, చికిత్సను సూచించదు. రొమ్ము ఆరోగ్య సమస్యలను అర్థం చేసుకోవడం, హెచ్చరిక సంకేతాలను గుర్తించడం, ఎప్పుడు వైద్య నిపుణుడిని సంప్రదించాలో తెలుసుకోవడంలో ప్రజలకు సహాయపడటమే దీని ఉద్దేశం.

అయితే రొమ్ము క్యాన్సర్ ప్రమాదాన్ని తగ్గించగల అంశాలపై కూడా దృష్టి పెట్టాలి. ఆరోగ్యకరమైన బరువు, క్రమం తప్పకుండా వ్యాయామం, పొగాకు వాడకాన్ని నివారించడం, మద్యపానాన్ని పరిమితం చేయడం, ఆరోగ్యకరమైన ఆహారపు అలవాట్లు పాటించడం, శిశువుకు పాలివ్వడం– ఇవన్నీ నివారణలో ముఖ్యమైన అంశాలు. అయినా, రొమ్ము క్యాన్సర్‌ను అన్ని సందర్భాల్లోనూ నివారించడం సాధ్యం కాదు. అందువల్ల నివారణ, ముందస్తు గుర్తింపు రెండూ కలిసే సాగాలి.

భారతదేశంలో ఏఐ, ఆరోగ్య కార్యకర్తలు, ప్రాథమిక ఆరోగ్య సంరక్షణ, ఇమేజింగ్, పాథాలజీ, నిపుణుల సేవలు, ప్రజారోగ్య అవగాహన, నివారణ– ఇవన్నీ సమన్వయంతో పనిచేసే వ్యవస్థ అవసరం. ఏఐ ఆధారిత అవగాహన కార్యక్రమాలు సమయానుకూల ఆరోగ్య సేవలకు సంబంధించిన సమాచారాన్ని మహిళలకు అందిస్తాయి. ఏఐ వ్యవస్థల సంఖ్య, అభివృద్ధి చేసిన అల్గోరిథమ్‌లు, సృష్టించిన హోలోగ్రామ్‌లు లేదా స్క్రీనింగ్ చేసిన మహిళల సంఖ్యతోనే విజయాన్ని కొలవకూడదు. ఎంతమంది మహిళలకు విశ్వసనీయ సమాచారం అందింది, క్యాన్సర్ ముందుగా గుర్తించగలిగామా, తగిన చికిత్స అందిందా, ప్రాణాలు కాపాడగలిగామా– ఇవే విజయానికి నిజమైన ప్రమాణాలు.

భారతదేశానికి అర్థవంతమైన పురోగతి సాధించగల సాంకేతికత, నైపుణ్యం రెండూ ఉన్నాయి. సమగ్ర ప్రజారోగ్య వ్యూహంలో వాటిని అనుసంధానించేందుకు దూరదృష్టి, సమన్వయం అవసరం. ఏఐ ఒక్కటే భారతదేశంలో రొమ్ము క్యాన్సర్ కథను మార్చలేదు.

- డా. పి. రఘురామ్

చైర్మన్, ఉషాలక్ష్మి బ్రెస్ట్ క్యాన్సర్ ఫౌండేషన్

(అక్టోబర్‌: రొమ్ము క్యాన్సర్‌

అవగాహన మాసం)