ఉదయ్ కోటక్కు పద్మ భూషణ్
ABN , Publish Date - Jan 26 , 2026 | 05:05 AM
ప్రముఖ బ్యాంకర్ ఉదయ్ కోటక్ పద్మ భూషణ్ పురస్కారానికి ఎంపికయ్యారు. దేశ ఆర్థిక, బ్యాంకింగ్ రంగాలకు చేసిన సేవలకు గుర్తింపుగా ఉదయ్ కోటక్ను 2026 సంవత్సరానికి గాను ఈ పురస్కారానికి ఎంపిక చేసినట్టు కేంద్ర ప్రభుత్వం ప్రకటించింది.
టీటీకే ప్రెస్టీజ్ జగన్నాథన్కు పద్మశ్రీ
న్యూఢిల్లీ: ప్రముఖ బ్యాంకర్ ఉదయ్ కోటక్ పద్మ భూషణ్ పురస్కారానికి ఎంపికయ్యారు. దేశ ఆర్థిక, బ్యాంకింగ్ రంగాలకు చేసిన సేవలకు గుర్తింపుగా ఉదయ్ కోటక్ను 2026 సంవత్సరానికి గాను ఈ పురస్కారానికి ఎంపిక చేసినట్టు కేంద్ర ప్రభుత్వం ప్రకటించింది. 1982లో కోటక్ క్యాపిటల్ మేనేజ్మెంట్ ఫైనాన్స్ లిమిటెడ్ (అనంతరం కోటక్ మహీంద్రా ఫైనాన్స్) పేరుతో ఒక నాన్ బ్యాంకింగ్ ఫైనాన్స్ కంపెనీ (ఎన్బీఎ్ఫసీ)ని స్థాపించి 2003లో దాన్ని పూర్తి స్థాయి ప్రెవేట్ బ్యాంకుగా మార్చి అనేక ఆర్థిక సేవల రంగాల్లోకి కార్యకలాపాలను విస్తరించారు. 2014లో ఐఎన్జీ వైశ్యా బ్యాంక్ను కొనుగోలు చేయటంలో ఉదయ్ కోటక్ కీలక పాత్ర పోషించారు. అనంతరం కోటక్ గ్రూప్ 2015లో సాధారణ బీమా వ్యాపారంలోకి అడుగుపెట్టింది. కాగా బ్యాంక్ సీఈఓ పదవి నుంచి తప్పుకున్నా ఎగ్జిక్యూటివ్ డైరెక్టర్గా ఇప్పటికీ కోటక్ మహీంద్రా బ్యాంక్కు ఉదయ్ కోటక్ మార్గదర్శకత్వం వహిస్తున్నారు.
ప్రకటించిన కేంద్ర ప్రభుత్వం
కిచెన్ మొఘల్గా ప్రసిద్ధి చెందిన టీటీకే ప్రెస్జీజ్ గ్రూప్ చైర్మన్ ఎమిరెటస్ టీటీ జగన్నాథన్ ఈ ఏడాది పద్మశ్రీ అవార్డుకు ఎంపికయ్యారు. మరణానంతరం ఆయనకు ఈ పురస్కారం ప్రకటించారు. గత ఏడాది అక్టోబ రులో ఆయన 77 ఏళ్ల వయసులో కన్నుమూశారు. వాణిజ్య, పారిశ్రామిక రంగాలకు ఆయన చేసిన సేవలకు గుర్తింపుగా జగన్నాథన్ను ఈ పురస్కారానికి ఎంపిక చేసినట్టు అధికార వర్గాలు తెలిపాయి. ప్రెస్టీజ్ బ్రాండ్ పేరుతో తీసుకువచ్చిన ప్రెజర్ కుక్కర్స్తో పాటు భారతీయ కుక్వేర్కు అంతర్జాతీయంగా ప్రాచుర్యం తీసుకురావటంలో ఆయన విశేష కృషి చేశారు. ఐఐటీ మద్రాస్ నుంచి గోల్డ్ మెడల్ అందుకున్న ఆయన కార్నెల్ యూనివర్సిటీ నుంచి పీహెచ్డీ పూర్తి చేశారు. దాదాపు నాలుగు దశాబ్దాలు ఆయన టీటీకే ప్రెస్టీజ్ సారథ్య బాధ్యతలు నిర్వర్తించారు. కాగా మహారాష్ట్రకు చెందిన ఔత్సాహిక పారిశ్రామికవేత్త డీఏఎస్ ఆఫ్షోర్ ఇంజనీరింగ్ లిమిటెడ్ ఎండీ అశోక్ ఖాడే, సోలార్ ఇండస్ట్రీస్ వ్యవస్థాపకుడు సత్యనారాయణన్ నువాల్కు కూడా పద్మశ్రీ పురస్కారాలను ప్రభుత్వం ప్రకటించింది.
