ప్రతికూలతల్లోనూ టెక్‌ కంపెనీల హవా

• 6శాతం వృద్ధితో రూ. 28.65 లక్షల కోట్లకు ఆదాయం

• మరో 1.35 లక్షల ఉద్యోగాలు జూనాస్కామ్‌ అంచనా

ముంబై: అంతర్జాతీయ భౌగోళిక రాజకీయ అనిశ్చితులు, కృత్రిమ మేధ (ఏఐ) విధ్వంసం నేపథ్యంలోనూ దేశీయ టెక్నాలజీ రంగ ఆదాయం ఈ ఆర్థిక సంవత్సరం (2025-26) 6.1శాతం వృద్ధితో 31,500 కోట్ల డాలర్లకు (సుమారు రూ.28.65 లక్షల కోట్లు) చేరుకోనుందని నాస్కామ్‌ అంటోం ది. నాస్కామ్‌ మంగళవారం విడుదల చేసిన నివేదిక ప్రకారం.. 2025-26లో టెక్‌ రంగంలో ఉద్యోగుల సంఖ్య నికరంగా మరో 1.35 లక్షలు పెరిగి 59.5 లక్షలకు చేరుకోనుంది. గత ఆర్థిక సంవత్సరం చివరి నాటికి దేశంలోని ఐటీ ఉద్యోగుల మొత్తం సంఖ్య 58.15 లక్షలుగా ఉంది. 2024-25 లో ఇండస్ట్రీ నికరంగా 1.33 లక్షల మందిని నియమించుకుంది. ఈ సారి ఉద్యోగాల వృద్ధి 2.3ు, ఆదాయ వృద్ధి 6.1శాతం మధ్య స్పష్టమైన భేదం కనిపించినప్పటికీ ఇండస్ట్రీ పనితీరు సంతృప్తికరంగానే ఉందని నాస్కామ్‌ ప్రెసిడెంట్‌ రాజేశ్‌ నంబియార్‌ అన్నారు.

మరిన్ని ముఖ్యాంశాలు..

• టెక్నాలజీ రంగంలో గణనీయ మార్పులు వస్తున్నప్పటికీ, ఐటీ రంగంలో ఉద్యోగుల పెరుగుదల భవిష్యత్తులో కూడా కొనసాగుతుంది. ప్రస్తుత 59.5 లక్షల మంది ఉద్యోగుల్లో ఇప్పటికే 20 లక్షల మందికి పైగా ఏఐలో శిక్షణ తీసుకున్నారు. అందులో 3 లక్షల మంది అడ్వాన్స్‌డ్‌ ఏఐ నైపుణ్యాలు కలిగి ఉన్నారు.

• ఈ ఆర్థిక సంవత్సరంలో ఐటీ కంపెనీల ఏఐ ఆదాయం 1,000-1,200 కోట్ల డాలర్ల (రూ.90,950-1,09,140 కోట్లు) స్థాయిలో ఉండవచ్చని అంచనా.

• 2024-25 ఆర్థిక సంవత్సరం ఐటీ పరిశ్రమ ఆదాయాన్ని గత ఫిబ్రవరిలో అంచనా వేసిన 28,260 కోట్ల డాలర్ల నుంచి 29,700 కోట్ల డాలర్లకు పెంచింది.

• గతంలో ఐటీ రంగ ఆదాయంలో అమెరికా మార్కెట్‌ అధిక వృద్ధి కలిగి ఉండేది. కానీ, ఈ సారి ఆసియా పసిఫిక్‌, పశ్చిమాసియా మార్కె ట్లు అద్భుతమైన వృద్ధి నమోదు చేశాయి. దేశీయ మార్కెట్‌ ఆదాయ వృద్ధి 7.9 శాతంగా నమోదయ్యే అవకాశం ఉంది. ప్రపంచ సగటు కంటే ఇది అధికం.

• రంగాలవారీగా చూస్తే, హెల్త్‌కేర్‌, ట్రావెల్‌, రవాణా రంగాలు వేగవంతమైన వృద్ధి కనబరిచాయి.