ఐదేళ్లలో రూ.3,000 కోట్ల ఆదాయ లక్ష్యం

డ్రెడ్జింగ్‌ కార్పొరేషన్‌

న్యూఢిల్లీ: విశాఖపట్నం కేంద్రంగా పని చేస్తున్న డ్రెడ్జింగ్‌ కార్పొరేషన్‌ ఆఫ్‌ ఇండియా (డీసీఐ) వచ్చే ఐదేళ్ల కాలంలో ఆదాయాలు రెట్టింపు చేసుకోవడంపై దృష్టి సారించింది. 2014-15లో రూ.550 కోట్లున్న ఆదాయం 2024-25 నాటికి రూ.1,148 కోట్లకు చేరిందని, మరో ఐదారేళ్లలో దీన్ని రూ.3,000 కోట్లకు చేర్చాలని లక్ష్యంగా పెట్టుకున్నట్లు కంపెనీ ఎండీ, సీఈఓ ఎస్‌ దివాకర్‌ చెప్పారు. ఈ నెల 29వ తేదీన సంస్థ స్వర్ణోత్సవ వేడుకలు నిర్వహిస్తున్న సందర్భంగా ఆయన మాట్లాడుతూ.. ఇందుకోసం తాము కొత్త మార్కెట్లు, నూతనంగా ప్రవేశించే అవకాశం ఉన్న రంగాల కోసం అన్వేషిస్తున్నట్టు చెప్పారు. ప్రధానంగా రిజర్వాయర్లు, డ్యాములకు కూడా తమ కార్యకలాపాలను విస్తరించాలనుకుంటున్నట్టు తెలిపారు.