హంద్రీ-నీవా పనుల్లో నిర్లక్ష్యం

• కాంట్రాక్టు సంస్థ తొలగింపు

• రాష్ట్ర మంత్రివర్గం నిర్ణయం

అమరావతి, మార్చి 26(ఆంధ్రజ్యోతి): రాయలసీమ జీవనాడి హంద్రీనీవా సుజల స్రవంతి(హెచ్‌ఎన్‌ఎ్‌సఎస్‌) ప్రాజెక్టు 7, 8 ప్యాకేజీ పనులు సకాలంలో పూర్తిచేయని కాంట్రాక్టు సంస్థను తప్పించాలన్న జలవనరుల శాఖ నిర్ణయాన్ని క్యాబినెట్‌ ఆమోదించింది. ఈ రెండు ప్యాకేజీల ద్వారా సిమెంట్‌ లైనింగ్‌ వేసేందుకు కాంట్రాక్టు సంస్థకు గతంలో పనులు అప్పగించారు. హెచ్‌ఎన్‌ఎ్‌సఎస్‌ ప్రధాన కాలువ అభివృద్ధి పనులు రూ.606.03 కోట్లతో చేపట్టేందుకు మంత్రివర్గం ఆమోదం తెలిపింది. ప్యాకేజీ-36 పనులు చేపట్టిన కాంట్రాక్టరు సరిగా పనిచేయకపోవడంతో అతడిని తొలగించారు. ఈ ప్యాకేజీ పూర్తయితే మరో 55,608 ఎకరాలకు సాగునీరు అందుతుంది.

క్యాబినెట్‌ ఆమోదించిన మరికొన్ని నిర్ణయాలు

• పోలవరం నిర్వాసితుల కోసం గంగవరం, అడ్డతీగల, రాజవొమ్మంగి మండలాల్లో సేకరించిన 4,520.62 ఎకరాలకు.. ఒక్కో ఎకరానికి రూ.12.50 లక్షలు చొప్పున చెల్లించడానికి క్యాబినెట్‌ ఆమోదించింది.

• పుంగనూరు కెనాల్‌ వద్ద అంచనాకు మించి గట్టి రాయి రావడంతో గట్టును పటిష్ఠపరిచేందుకు 51శాతం అదనంగా ఖర్చు చేయాల్సి వస్తుందని ఇంజనీరింగ్‌ అధికారులు ప్రతిపాదించారు. గతంలో రూ.112.45 కోట్ల మేర ఖర్చవుతుందన్న అంచనాలను తాజాగా రూ.169.90 కోట్లకు పెంచడానికి అంగీకారం తెలిపింది.

• పుంగనూరు బ్రాంచి కెనాల్‌ 74 కి.మీ. నుంచి 165.80 కి.మీ. వరకూ గత ఆర్థిక సంవత్సరంలో చేపట్టిన పనులకు గాను రూ.27.44 లక్షలు చెల్లించేందుకు సమ్మతి.

• కర్నూలు జిల్లాలో గురు రాఘవేంద్ర ప్రాజెక్టు పరిధిలో ఏడు ఎత్తిపోతల పథకాలకు ఆపరేషన్‌ అండ్‌ మెయింటెనెన్స్‌ (ఓ అండ్‌ ఎం) పనులు చేపట్టేందుకు రూ.4.41 కోట్లు మంజూరు చేసేందుకు ఆమోదం.

• చర్లోపల్లి రిజర్వాయరు నుంచి కృష్ణా జలాలను తరలించే సమయంలో కాలువ వద్ద గస్తీ కాసేందుకు లస్కర్లను నియమించేందుకు ఆమోదం తెలిపింది.

• జల వనరుల అభివృద్ధి సంస్థ ద్వారా కొప్పోలు పంప్డ్‌ హైడ్రో పవర్‌ స్టోరేజీ ప్రాజెక్టుకు గండికోట రిజర్వాయరు నుంచి నీటిని కేటాయించేందుకు ఆమోదం.