పశువులకూ ముఖ ఆధారిత గుర్తింపు!

• ముక్కు మీద చర్మం ముడతల వివరాల నమోదు

• అక్రమంగా రవాణా అయ్యేవాటిని గుర్తించే అవకాశం

అమరావతి, ఫిబ్రవరి 16(ఆంధ్రజ్యోతి): మనుషులకు ఆధార్‌ నంబరు, ఫింగర్‌ ప్రింట్‌, కంటి ఐరిస్‌ ఉన్నట్లే.. పశువులకూ ముఖ ఆధారిత (ముక్కు మీద చర్మం ముడతల ఆధారంగా) గుర్తింపు సంఖ్య ఇవ్వాలని ప్రభుత్వం నిర్ణయించింది. ’గో-ఆధార్‌’ పేరుతో తిరుపతి జిల్లాలో ప్రయోగాత్మకంగా ఈ ప్రక్రియను పశుసంవర్ధక శాఖ ఇప్పటికే చేపట్టింది. ఆ జిల్లాలో దాదాపు 4లక్షల పశువులు ఉండగా, 1.02 లక్షల పశువులకు ముఖ ఆధారిత గుర్తింపును నమోదు చేశారు. అక్కడ ఈ విధానం సక్సెస్‌ కావడంతో ఈ ఏడాది రాష్ట్రవ్యాప్తంగా అమలు చేయాలని ప్రభుత్వం నిర్ణయించింది. ఇదే విషయాన్ని 2026-27 వ్యవసాయ బడ్జెట్‌ ప్రసంగంలో మంత్రి అచ్చెన్నాయుడు వెల్లడించారు. రాష్ట్రంలో దాదాపు కోటి పశువులు ఉండగా, ప్రతి పశువుకు ముఖ ఆధారిత గుర్తింపు నమోదు చేయనున్నట్లు పశుసంవర్ధక శాఖ డైరెక్టర్‌ దామోదర్‌నాయుడు ‘ఆంధ్రజ్యోతి’కి తెలిపారు. మనుషుల మాదిరిగానే ఏ పశువుకైనా ముక్కు మీద చర్మపు ముడతలు ఒకేలా ఉండవని చెప్పారు. గతంలో పశువుల చెవులకు వేసే ట్యాగ్‌ నంబరునే పశువుకు ఆధార్‌గా పరిగణించారు. అయితే అక్రమ రవాణా సమయంలో ట్యాగ్‌ను పీకేస్తున్నారు. దీనివల్ల అక్రమ రవాణా జరిగే పశువుల్ని పట్టుకున్నా.. ఏ పశువు ఎవరిదో గుర్తించడం కష్టంగా ఉంటోంది. ముఖ ఆధారిత గుర్తింపు వల్ల పశువుని గుర్తించడం చాలా తేలికని అంటున్నారు. ఈ విధానాన్ని త్వరలో కుప్పంలోనూ ప్రవేశపెట్టడానికి పశు సంవర్ధక శాఖ చర్యలు తీసుకుంటోంది. ఇదే విధానాన్ని పశుసంవర్ధక శాఖ సహకారంతో ప్రయోగాత్మకంగా అమలు చేయడానికి ప్రముఖ బీమా కంపెనీ కూడా ముందుకొచ్చిందని అధికారులు తెలిపారు.