NTR Health University: ఏంటీ నియామకం
ABN , Publish Date - Jan 02 , 2026 | 05:51 AM
ఎన్టీఆర్ హెల్త్ యూనివర్సిటీ ‘సీవోఈ’ నియామకంపై అభ్యంతరాలు వ్యక్తం అవుతున్నాయి.
ఎన్టీఆర్ హెల్త్ యూనివర్సిటీ ‘సీవోఈ’ నియామకంపై తీవ్ర అభ్యంతరాలు
రూల్స్ ప్రకారం వర్సిటీ అనుబంధ కాలేజీల ప్రొఫెసర్లకే సీవోఈగా చాన్స్
కానీ, తిరుపతి స్విమ్స్ నుంచి ఎంపిక
వర్సిటీ చరిత్రలోనే ఇది తొలిసారి
శ్రీకాంత్ను నియమిస్తూ ఉత్తర్వులు జారీ
అమరావతి, జనవరి 1 (ఆంధ్రజ్యోతి) : ఎన్టీఆర్ హెల్త్ యూనివర్సిటీ ‘సీవోఈ’ నియామకంపై అభ్యంతరాలు వ్యక్తం అవుతున్నాయి. వర్సిటీ కంట్రోలర్ ఆఫ్ ఎగ్జామినేషన్స్ (సీవోఈ)గా డా. సీహెచ్ శ్రీకాంత్ను నియమిస్తూ ఆరోగ్యశాఖ సెక్రటరీ సౌరబ్ గౌర్ గురువారం ఉత్తర్వులు జారీ చేశారు. వర్సిటీకి సంబంధం లేనివ్యక్తిని ఈ పోస్టులో నియమించడం ఇది తొలిసారి. దీనిని వైద్యులు తప్పుబడుతున్నారు. నిబంధనల ప్రకారం హెల్త్ వర్సిటీ అనుబంధ కాలేజీల్లో విధుల నిర్వహిస్తున్న ప్రొఫెసర్లను ఈ పోస్టులో నియమించాలి. అయితే, డా. సీహెచ్ శ్రీనివాస్ ప్రస్తుతం తిరుపతి స్విమ్స్లో అనాటమీ ప్రొఫెసర్గా విధులు నిర్వహిస్తున్నారు. ఆయనను ఫారెన్ డిప్యుటేషన్ సర్వీసెస్ కింద రాష్ట్ర ప్రభుత్వం పరిధిలోకి తీసుకువచ్చి.. సీవోఈగా నియమించారు. దీనిపై తీవ్ర అభ్యంతరాల వ్యక్తం అవుతున్నాయి. ‘ సీవోఈ’ పోస్టు అతి కీలకమైనది. వేల మంది వైద్య విద్యార్థుల భవిష్యతు సీవోఈ చేతుల్లోనే ఉంటుంటి. అలాంటి కీలకమైన పోస్టులో వర్సిటీ అనుబంధ ప్రభుత్వ మెడికల్ కాలేజీల్లో విధులు నిర్వహించే ప్రొఫెసర్లను మాత్రమే ఇప్పటివరకూ నియమించారు. వర్సిటీ ప్రారంభమైన నాటి నుంచి ప్రభుత్వం ఈ నిబంధన పాటిస్తూ వచ్చింది. అందుకు భిన్నంగా ఈసారి ఎందుకు వెళ్లాల్సి వచ్చిందనేది ఆరోగ్యశాఖ అధికారులే సమాధానం చెప్పాలి.
