అమరావతి కేంద్రంగా ఎఫ్‌ఆర్‌ఆర్‌ఓ కార్యాలయం

• రాజధానికి కేంద్ర ప్రభుత్వం కేటాయింపు

• కేంద్ర హోంశాఖ గెజిట్‌ నోటిఫికేషన్‌

న్యూఢిల్లీ, సెప్టెంబరు 23 (ఆంధ్రజ్యోతి): ఏపీ రాజధాని అమరావతికి కేంద్ర ప్రభుత్వం మరో కీలక కార్యాలయాన్ని కేటాయించింది. రాష్ట్రానికి ప్రత్యేకంగా విదేశీ ప్రాంతీయ రిజిస్ట్రేషన్‌ అధికారి (ఎఫ్‌ఆర్‌ఆర్‌ఓ) కార్యాలయాన్ని కేటాయిస్తూ కేంద్ర హోం శాఖ నిర్ణయం తీసుకుంది. హోం శాఖ సంయుక్త కార్యదర్శి పేరుతో ఈ మేరకు గెజిట్‌ నోటిఫికేషన్‌ విడుదలైంది. ఇమ్మిగ్రేషన్‌ అండ్‌ ఫారినర్స్‌ చట్టం 2025 కింద గతంలో జారీ చేసిన నోటిఫికేషన్లలో కేంద్ర ప్రభుత్వం తాజాగా సవరణలు చేసింది. పాత జాబితాలోని క్రమసంఖ్య 8 నుంచి ఆంధ్రప్రదేశ్‌ను తొలగించి, కొత్తగా క్రమసంఖ్య 17ను చేర్చి ‘విదేశీ ప్రాంతీయ రిజిరేస్టషన్‌ అధికారి, అమరావతి’ పరిధి కింద ఆంధ్రప్రదేశ్‌ను చేర్చారు. రాష్ట్రానికి వచ్చే విదేశీయుల రిజిస్ట్రేషన్లు, వీసా గడువు పొడిగింపు, వీసా మార్పిడి, ఇతర ఇమ్మిగ్రేషన్‌ వ్యవహారాలను ఈ కార్యాలయం పర్యవేక్షిస్తుంది. రాష్ట్రానికి విదేశీ ప్రతినిధుల రాకపోకలకు ఈ కార్యాలయం ఎంతో ఉపయోగపడుతుంది.