Cybercrime Police: ఐ బొమ్మ నిర్వాహకుడు ఇమ్మడి రవి అరెస్ట్‌

• ఫ్రాన్స్‌ నుంచి వచ్చిన వెబ్‌సైట్‌ అడ్మిన్‌

• కూకట్‌పల్లిలో అరెస్టు చేసిన పోలీసులు

• అతడి ఖాతాలోని రూ.3 కోట్లు ఫ్రీజ్‌

• పైరసీకి హైఎండ్‌ టెక్నాలజీ వినియోగం

• ఇందుకు హ్యాకర్లకు లక్షల్లో చెల్లింపులు

• తమను అడ్డుకోలేరంటూ పోస్టులు

• పెట్టిన రోజుల వ్యవధిలోనే అదుపులోకి

హైదరాబాద్‌ సిటీ, నవంబరు 15 (ఆంధ్రజ్యోతి): కొత్త సినిమాలు, ఓటీటీ కంటెంట్‌ను నిమిషాల వ్యవధిలో పైరసీ చేసి తమ సైట్‌లో అప్‌లోడ్‌ చేస్తున్న ‘ఐ బొమ్మ’ నిర్వాహకుడు ఇమ్మడి రవిని సైబర్‌ క్రైం పోలీసులు అరెస్ట్‌ చేశారు. ఆయనకు సంబంధించి మూడు బ్యాంకు ఖాతాల్లో ఉన్న రూ.3 కోట్లను ఫ్రీజ్‌ చేశారు. కొత్త సినిమాలను థియేటర్లలో ప్రదర్శించే సమయంలోనే రికార్డ్‌ చేసి, వాటిని ‘ఐ బొమ్మ’ వెబ్‌సైట్‌లో పెడుతున్నారని, పైరసీ కారణంగా 2023లో భారత సినీ పరిశ్రమకు రూ.22,400 కోట్లు నష్టం వాటిల్లగా.. ఒక్క తెలుగు సినీ పరిశ్రమే 2024లో రూ.3,700 కోట్లు నష్టపోయిందని తెలుగు ఫిలిం ఇండస్ట్రీ యాంటీ పైరసీ టీమ్‌ హైదరాబాద్‌ సైబర్‌ క్రైం పోలీసులకు ఫిర్యాదు చేసింది. ఈ కేసును చాలెంజింగ్‌గా తీసుకున్న సైబర్‌ క్రైం అధికారులు దర్యాప్తు చేసి పైరసీ ముఠాకు చెందిన ఐదుగురు కీలక నిందితులను అరెస్ట్‌ చేశారు. వారి నుంచి భారీ సంఖ్యలో పైరేటెడ్‌ సీడీలను స్వాధీనం చేసుకున్నారు. ముఠాలో కీలక వ్యక్తి, పట్నాకు చెందిన అశ్వినీ కుమార్‌, ఇతర నిందితులు ఇచ్చిన సమాచారం మేరకు ‘ఐ బొమ్మ’ అడ్మిన్‌ ఇమ్మడి రవికి సంబంధించి వివరాలు రాబట్టారు. అతడి కదలికలపై 3నెలలుగా నిఘా పెట్టారు. కొంత కాలంగా ఆయన కరీబియన్‌ దీవుల్లో ఉంటూ ‘ఐ బొమ్మ’ వెబ్‌సైట్‌ నిర్వహిస్తున్నాడని తెలుసుకున్నారు. ఇటీవల ఆయన ఫ్రాన్స్‌ నుంచి కూకట్‌పల్లిలోని ఇంటికి వచ్చినట్లు గుర్తించారు. వెంటనే, దాడి చేసి అరెస్ట్‌ చేశారు. అనంతరం నాంపల్లి కోర్టుకు తరలించారు. అతడి నుంచి పోలీసులు కీలక సమాచారం సేకరించారు. అతడికి సహకరించిన, నెట్‌వర్క్‌లో ఉన్న మరికొందరి పేర్లు బయటకు వచ్చే అవకాశమున్నట్లు తెలుస్తోంది. త్వరలో మరికొన్ని అరెస్ట్‌లు జరిగే అవకాశమున్నట్లు తెలుస్తోంది.

సర్వర్లు హ్యాక్‌ చేసి...: ‘ఐ బొమ్మ’లో ఐ అంటే రవి ఇంటి పేరు ఇమ్మడి అని పోలీసులు గుర్తించారు. గడిచిన ఆరేళ్లుగా సదరు వెబ్‌సైట్‌లో పైరసీ చిత్రాలను అప్‌లోడ్‌ చేస్తున్నాడని, ఈ కాలంలో వేలాది సినిమాలను అప్‌లోడ్‌ చేశాడని దర్యాప్తులో భాగంగా గుర్తించారు. హైఎండ్‌ టెక్నాలజీని ఉపయోగించి సినిమా ప్రసారం చేసే సంస్థల సర్వర్లు హ్యాక్‌ చేసేవాడు. డీసీఐ పరికరాలు, హార్డ్‌ డిస్కులు, మెయిల్స్‌లో ఉన్న సినిమాను చోరీ చేస్తున్నాడు. ఇందు కోసం రవి హ్యాకర్లకు లక్షలు చెల్లిస్తున్నాడని పోలీసులు తాజాగా గుర్తించారు. ‘మమ్మల్ని ఆపలేరు.. వెతకలేరు’ అంటూ రవి గతంలో పోలీసులకు సవాల్‌ విసిరాడు. కానీ పోలీసులు వ్యూహాత్మకంగా అరెస్టు చేశారు.