kumaram bheem asifabad- చీకటి వెలుగుల రంగేళి

- లక్ష్మీపూజలకు ఏర్పాట్లు

- రంగురంగుల పూలు, మామిడి తోరణాలతో అలంకరణ

ఆసిఫాబాద్‌, ఆక్టోబరు 19 (ఆంధ్రజ్యోతి): దీపావళి అనే సరికి ఢమఢమ భీకర ధ్వనుల బాణాసంచా ఆర్భాటాలు స్పురిస్తాయి. దీపావళి అంటే ఏమిటో గ్రహించినప్పుడే అందం. ఆనందం. దీపం జ్ఞానానికి ప్రతీక.. ఏ శుభకార్యం జరిగినా జ్యోతి ప్రజ్వలనతోనే ప్రారంభిస్తాం. దీపావళి నాటి వెలుగులు జగత్‌ నంతటిని కాంతిమయం చేస్తాయి. ప్రతీ వ్యక్తి జీవితంలో దీపావళి ఒక మరుపురాణి పండుగ... ఈ రోజు మహిళలు బొమ్మల పండుగగా జరుపుకుంటారు. ఇంట్లో బొమ్మను కొలువును ఏర్పాటు చేసి ప్రత్యేక కార్యక్రమాలు నిర్వహిస్తారు. వ్యాపారుల దీపావళి నాడు లక్ష్మీపూజ చేసి తమ దుకాణాలను ప్రత్యేకంగా అలంకరించుకుంటారు. రంగురంగుల పూలు, మామిడి తోరణాలతో దుకాణాలు, ఇళ్లను అలంకరించుకుంటారు. దీపావళి అంటే దీపాల వరుస. పటాకులు మోతలు.. కాకరపూల కాంతులు,, భూచక్రాల వెలుగులు.. చిచ్చ బుడ్ల జిలుగులు..పసందైన పిండివంటలే కాదు.. అల్లరి పిల్లలు.. పిల్లల్లా మారే పెద్దలు.. కేరింతలు.. తుల్లింతలు కలిసిన పండుగ. వెలుగుపూల వేడుక. చీకట్లను పార దోలి వెలుగులను నింపే దివ్వెల పండుగ. దీపావళికి అంతా సిద్ధమైంది.

మార్కెట్‌లో పండుగ సందడి..

జిల్లాలో దీపావళి పండుగ సందడి నెలకొంది. దీపా వళి పర్వదినాన్ని ఘనంగా నిర్వహించేందుకు ఇక్కడి ప్రాంత వాసులు ఆదివారం జరిపిన కొనుగోళ్లతో వ్యాపార సంస్థలన్నీ కళకళలాడాయి. ప్రధానంగా స్టేషనరీ దుకాణాలు, వస్త్ర దుకాణాలు, పూజా సామాగ్రి విక్రయ కేంద్రాలు సందడిగా నిలిచాయి. ఉదయం నుంచి కొనుగోలుదారులతో బిజీగా కనిపించాయి. వ్యాపారులు ఉదయం వేళలో ముహుర్తం ప్రకారం స్టేషనరీ దుకాణాలకు వెళ్లి తమకు అవసరమైన ఖాతా బుక్‌లను కొనుగోలు చేశారు. లక్ష్మీపూజలను ఘనంగా నిర్వహించేందుకు గాను అవసరమైన పూజా సామాగ్రిని కొనుగోలు చేశారు. పట్టణంలోని వస్త్ర దుకాణాలన్నీ కొనుగోలుదారులతో కిటకిటలాడాయి. ఏ షాపులో చూసినా సందడే సందడి కనిపించింది. రోడ్లపై పూల దుకాణాలు, ప్రమిదల విక్రయ కేంద్రాలు వెలిశాయి. వ్యాపారులు తమ తమ సంస్థలను రంగులతో తీర్చిదిద్దుతూ విద్యుత్‌ బల్బులను అమర్చారు. విద్యుత్‌ దీపాలతో విరజిమ్మే వెలుగులతో గృహాలు కళకళలాడుతున్నాయి. ఇక టపాసుల విక్రయ కేంద్రాల వద్ద పెద్ద సంఖ్యలో ప్రజలు రావడంతో ఆసిఫాబాద్‌ పట్టణంలోని టపాసుల దుకాణాల వద్ద సందడి నెలకొన్నది. ఇక బస్టాండ్‌ ప్రయాణికులతో కిక్కిరిసి పోయింది. మార్కెట్‌లో ఎక్కడ చూసి దీపావళి శోభ సంతరించుకుంది. పండుగ సందర్భంగా బాణాసంచా కాల్చిన సమయంలో ప్రతి ఒక్కరూ అప్రమత్తంగా ఉండాలని అధికారులు చెబుతు న్నారు. పండుగను సంతోషమయం చేసుకోవాలని సూ చించారు.