Chinta Prabhakar: కవిత రాక్షసి
ABN , Publish Date - Nov 17 , 2025 | 05:22 AM
కారణజన్ముడి కడుపున కవిత లాంటి రాక్షసి పుట్టడం దురదృష్టకరమని సంగారెడ్డి బీఆర్ఎస్ ఎమ్మెల్యే చింతా ప్రభాకర్ తీవ్రంగా వ్యాఖ్యానించారు.
కారణజన్ముడి కడుపున పుట్టడం దురదృష్టకరం
వ్యాపారాల్ని కాపాడుకునేందుకే రేవంత్తో కుమ్మక్కు
హరీశ్రావుకు ఆమె క్షమాపణ చెప్పాలి
సంగారెడ్డి ఎమ్మెల్యే చింతా ప్రభాకర్ తీవ్ర వ్యాఖ్యలు
నిజామాబాద్లో చెల్లని రూపాయి.. ఇక్కడ చెల్లుతుందా
ఎమ్మెల్యే మాణిక్రావు ఎద్దేవా.. ఆమె కాంగ్రెస్ ట్రాప్లో పడ్డారు: పార్టీ విప్ వివేకానంద
సంగారెడ్డి రూరల్, హైదరాబాద్, నవంబరు 16 (ఆంధ్రజ్యోతి): కారణజన్ముడి కడుపున కవిత లాంటి రాక్షసి పుట్టడం దురదృష్టకరమని సంగారెడ్డి బీఆర్ఎస్ ఎమ్మెల్యే చింతా ప్రభాకర్ తీవ్రంగా వ్యాఖ్యానించారు. తన వ్యాపారాలను కాపాడుకునేందుకు ముఖ్యమంత్రి రేవంత్రెడ్డితో చేతులు కలిపి బీఆర్ఎస్ పైనా, తన తండ్రి కేసీఆర్, సోదరుడు కేటీఆర్లపైనా కవిత విమర్శలు చేయడం తగదన్నారు. లిక్కర్ కేసులో జైలుకు వెళ్లినప్పుడు కేసీఆర్, కేటీఆర్, హరీశ్రావులు ఆమెకు అండగా నిలిచారని పేర్కొన్నారు. రేవంత్రెడ్డి కోసం బీఆర్ఎస్ను నిందించడం మానుకుని ప్రభుత్వం ఇచ్చిన హామీలపై ప్రశ్నించాలని ఆయన హితవు పలికారు. జిల్లా కేంద్రం సంగారెడ్డిలోని ఎమ్మెల్యే క్యాంపు కార్యాలయంలో ఆదివారం జహీరాబాద్ ఎమ్మెల్యే మాణిక్రావు, మాజీ ఎమ్మెల్యే క్రాంతిలతో కలిసి చింతా ప్రభాకర్ విలేకరుల సమావేశంలో మాట్లాడారు. జనం బాట పేరుతో కవిత చేపట్టిన యాత్రలో ప్రజాసమస్యలపై మాట్లాడకుండా మాజీ మంత్రి హరీశ్రావుని, బీఆర్ఎ్సని విమర్శించడమే పనిగా పెట్టుకున్నారన్నారు. గత ఎన్నికల్లో హరీశ్రావు ఉమ్మడి మెదక్ జిల్లాలో పది స్థానాలకు ఏడు సీట్లు గెలిపించారని గుర్తు చేశారు. హరీశ్రావుపై చేసిన వ్యాఖ్యలకు ఆమె బేషరతుగా క్షమాపణలు చెప్పాలని డిమాండ్ చేశారు. నిజామాబాద్లో చెల్లని రూపాయి ఇక్కడ చెల్లుతుందా అని జహీరాబాద్ ఎమ్మెల్యే మాణిక్రావు ప్రశ్నించారు. కేసీఆర్ కుమార్తెగానే కవితకు గుర్తింపు వచ్చిందనే విషయాన్ని మరవొద్దని మాజీ ఎమ్మెల్యే క్రాంతి పేర్కొన్నారు.
కాంగ్రెస్కు ప్రయోజనం కలిగించేలా.. తెలంగాణ జాగృతి అధ్యక్షురాలు కవిత వ్యాఖ్యలున్నాయని, ఆమె కాంగ్రెస్ పార్టీ ట్రాప్లో పడ్డారని బీఆర్ఎస్ విప్ కె.పి.వివేకానంద ఆరోపించారు. ఆదివారం తెలంగాణ భవన్లో ఆయన మీడియాతో మాట్లాడారు. జూబ్లీహిల్స్ ఉప ఎన్నిక ముందు ఒకలా.. తర్వాత మరోలా ఆమె మాట్లాడుతున్నారని విమర్శించారు. కేటీఆర్, హరీశ్రావు, బీఆర్ఎస్ నేతలపై కవిత చేసిన వ్యాఖ్యలను ఖండిస్తున్నామన్నారు. కేసీఆర్ సర్కారులో పదేళ్ల్లు ఎంపీ, ఎమ్మెల్సీ వంటి పదవుల్లో ఉన్నప్పుడు లేని సమస్యలు ఆమెకు ఇప్పుడెందుకు వస్తున్నాయని వివేకానంద నిలదీశారు.
