TANA: తానా, కళావేదిక, గుడ్ వైబ్స్ ఆధ్వర్యంలో వైభవంగా ‘చిత్ర గాన లహరి’
ABN , Publish Date - Nov 04 , 2025 | 11:23 AM
న్యూజెర్సీలో తానా, కళావేదిక, గుడ్ వైబ్స్ సంయుక్త ఆధ్వర్యంలో చిత్ర గాన లహరి కార్యక్రమం వైభవంగా జరిగింది. ఈ ఈవెంట్కు సుమారు 2 వేల మంది హాజరయ్యారు. ఈ కార్యక్రమం తమకు కాలేజీ రోజుల్ని గుర్తుకు తెచ్చిందని కామెంట్ చేశారు.
ఇంటర్నెట్ డెస్క్: తానా, కళావేదిక, గుడ్ వైబ్స్ ఆధ్వర్యంలో నిర్వహించిన ‘చిత్ర గాన లహరి’ కార్యక్రమం న్యూజెర్సీ ప్రేక్షకులను మంత్రముగ్ధులను చేసింది. తెలుగు అసోసియేషన్ ఆఫ్ నార్త్ అమెరికా (తానా), గుడ్ వైబ్స్ ఈవెంట్స్, కళావేదిక సంయుక్త ఆధ్వర్యంలో ప్లెయిన్ఫీల్డ్ హైస్కూల్ ఆడిటోరియంలో జరిగిన ఈ సంగీత కార్యక్రమం ఘన విజయాన్ని సాధించింది (TANA).
పద్మభూషణ్ కె.ఎస్. చిత్ర, గాయకుడు శ్రీకృష్ణ.. ప్రతిభావంతులైన వాద్యకారులతో కలిసి చేసిన ఈ సంగీత కచేరీకి సుమారు 2000 మంది ప్రేక్షకులు హాజరయ్యారు. ఆడిటోరియం మొత్తం మధుర స్మృతులు, రాగాలు, భావోద్వేగాలతో నిండిపోయింది.
నాలుగున్నర గంటల పాటు సాగిన ఈ సంగీత విహారం ప్రేక్షకులను అమితంగా ఆకట్టుకుంది. పాత తెలుగు పాటలు, అద్భుతమైన సంగీత సమ్మేళనం, అభిమానుల చప్పట్లు, స్టాండింగ్ ఒవేషన్లతో కార్యక్రమం ఉత్సాహభరితంగా సాగింది. తమకు కాలేజీ రోజుల్ని గుర్తు చేసిన మధురస్మృతిగా ప్రేక్షకులు ఈ కార్యక్రమాన్ని అభివర్ణించారు.
కార్యక్రమం సందర్భంగా పద్మభూషణ్ కె.ఎస్. చిత్రకు న్యూజెర్సీ రాష్ట్ర ప్రతినిధులు, ఎడిసన్ నగర మేయర్ శామ్ జోషి చేతులమీదుగా న్యూజెర్సీ రాష్ట్రం, ఎడిసన్ టౌన్షిప్ ప్రొక్లమేషన్లను అందజేయడం విశేషం.
తానా కోశాధికారి రాజా కసుకుర్తి మాట్లాడుతూ, ‘న్యూజెర్సీలో ఈ అద్భుతమైన సంగీత విహారం నిర్వహించినందుకు చిత్రకు మనస్ఫూర్తిగా ధన్యవాదాలు తెలిపారు. ఇటీవల డెట్రాయిట్ తానా కాన్ఫరెన్స్లో ఆమె ఆరోగ్య కారణాల వల్ల పాల్గొనలేకపోయినా, ఈ రోజు ప్రదర్శన ఆ లోటును భర్తీ చేసిందని అన్నారు. కళాకారులు, విద్యార్థులను ప్రోత్సహిస్తున్నందుకు కళావేదిక అధ్యక్షురాలు స్వాతి అట్లూరిని ఆయన అభినందించారు. కార్యక్రమాన్ని సమన్వయ పరిచిన గుడ్ వైబ్స్ ఈవెంట్స్ అధ్యక్షురాలు స్రవంతి చుక్కపల్లిని కూడా ప్రశంసించారు. ఈ విజయవంతమైన కార్యక్రమానికి సహకరించిన ప్రేక్షకులు, స్థానిక సంస్థలకు కళావేదిక అధ్యక్షురాలు స్వాతి అట్లూరి, తానా బోర్డు సభ్యుడు రవి పొట్లూరి ధన్యవాదాలు తెలిపారు.
ఈ కార్యక్రమాన్ని తానా న్యూజెర్సీ రీజనల్ కోఆర్డినేటర్ సుధీర్ నరేపాలుపు, ఎడిసన్ సిటీ కల్చరల్ కోఆర్డినేటర్ ఉజ్వల్ కస్తాల, తానా కోశాధికారి రాజా కసుకుర్తి, తానా ఫౌండేషన్ ట్రస్టీలు శ్రీనివాస్ ఒరుగంటి, సతీష్ మేకా, యూత్ కోఆర్డినేటర్ శ్రీనివాస్ చెరుకూరి సమన్వయపరిచారు. అలాగే తానా న్యూయార్క్ రీజనల్ కోఆర్డినేటర్ శ్రీనివాస్ భారతవారపు, మిడ్ అట్లాంటిక్ రీజనల్ కోఆర్డినేటర్ ఫణి కంఠేటి తదితరులు పాల్గొన్నారు.
ఈ అద్భుతమైన కార్యక్రమాన్ని విజయవంతం చేసిన తానా బృందానికి, భాగస్వామ్య సంస్థలకు, వాలంటీర్లకు తానా అధ్యక్షుడు నరేన్ కొడాలి, ఎగ్జిక్యూటివ్ వైస్ ప్రెసిడెంట్ శ్రీనివాస్ లావు అభినందనలు తెలియజేశారు. ‘తెలుగు కళా, సంగీత పరంపరలను అమెరికాలో ప్రతిధ్వనింపజేసిన తానాకు గర్వకారణమైన కార్యక్రమం ఇది’ అని పేర్కొన్నారు.
ఈ వార్తలు కూడా చదవండి
కువైత్లో కార్మిక చట్టాలపై అవగాహన కార్యక్రమం
అమెరికాలో తెలుగు వారికి ఏ కష్టం వచ్చినా అండగా ఉంటాం: నాట్స్
