Sara Arjun In Dhurandhar Movie: సినిమానే నన్నుఎంచుకుంది

బాలనటిగా సినీ ప్రేక్షకులకు బాగా దగ్గరైన నటి సారా అర్జున్‌. ఇప్పుడు ‘ధురంధర్‌’ సినిమాతో ఓవర్‌నైట్‌ సెన్షేషన్‌గా మారారు. రణ్‌వీర్‌సింగ్‌ సరసన ఆమె పోషించిన పాత్రకు ప్రశంసలు దక్కుతున్నాయి. ఈ నేపథ్యంలో తన విజయంపై సారా పంచుకున్న విశేషాలివి.

‘‘మనం ఒకటి తలిస్తే దైవం మరోలా తలుస్తుంది. నా విషయంలోనూ అదే జరిగింది. బోర్డింగ్‌ స్కూల్‌లో చదువు పూర్తిచేసి నటనలో శిక్షణ కోసం విదేశాలకు వెళ్లాలనుకుంటున్న సమయంలో విధి నా కోసం అద్భుతమైన కథను సిద్ధం చేసింది. రణ్‌వీర్‌సింగ్‌ లాంటి స్టార్‌ హీరో సరసన ధురంధర్‌ సినిమాతో అరంగేట్రం చేసే అవకాశాన్ని అందించింది. ఈ ప్రయాణం నా కోసం విశ్వం రచించిన అద్భుత స్ర్కిప్ట్‌’’ అంటూ సారా గుర్తుచేసుకున్నారు.

ఊహించని పిలుపు

యాక్టింగ్‌ కోర్స్‌ కోసం అమెరికాలోని లీ స్ట్రాస్‌బర్గ్‌ ఇనిస్టిట్యూట్‌కు పంపాలని తండ్రి (నటుడు రాజ్‌ అర్జున్‌) ఏర్పాట్లు చేస్తున్న రోజులవి. సరిగ్గా అప్పుడే క్యాస్టింగ్‌ డైరెక్టర్‌ ముకేశ్‌ ఛబ్రా కార్యాలయం నుంచి ఆడిషన్‌కు రమ్మంటూ సారాకు ఊహించని పిలుపు వచ్చింది. ఏ సినిమా కోసమో తెలియకుండానే ఆమె ఆడిషన్‌కు హాజరయ్యారు. ఒకదాని తర్వాత మరోటి ఇలా కొన్ని నెలలపాటు ఈ ప్రక్రియ కొనసాగింది. ‘‘నిజం చెప్పాలంటే నేను ఏ సినిమా కోసం ఆడిషన్‌ ఇస్తున్నానో చివరి నిమిషం వరకు నాకు తెలియదు. ప్రతి రౌండ్‌లోనూ భిన్నమైన భావోద్వేగాలు పలికించాను. చివరి ఆడిషన్‌ మాత్రం ముకేశ్‌ ఛబ్రా స్వయంగా నిర్వహించారు. ఆ రోజు సన్నివేశంలో నేను పూర్తిగా లీనమైపోయాను. ఆ గదిలోంచి బయటకు వచ్చే సరికి కళ్లలో నీళ్లు ఉన్నాయి’’ అని సారా గుర్తుచేసుకున్నారు.

నా కోసం ఎదురుచూసిన కథ

‘‘ఆడిషన్‌ నుంచి బయటకు వచ్చిన ఆ క్షణమే నాకు అర్థమైంది. ఈ సినిమా నాకు కేవలం ఒక ప్రాజెక్టు కాదు. ‘ఆగు, తొందరపడకు.. నీ కోసం ఇక్కడో కథ ఎదురుచూస్తోంది’ అని ఈ విశ్వం నాతో మెల్లగా చెప్పినట్టు అనిపించింది. నాకు విజయం దక్కుతుందని గట్టి నమ్మకం ఉండేది. కానీ, అది ఎలా వస్తుందో అర్థమయ్యేది కాదు. ఈ సినిమా ఆ ప్రశ్నకు సమాధానం ఇచ్చింది’’ అని సారా అర్జున్‌ తన అనుభవాన్ని పంచుకున్నారు. ఇప్పుడు తనలో ఎలాంటి ప్రశ్నలు లేవని, మరిన్ని మంచి పాత్రలు చేయాలన్న తపన మాత్రమే ఉందని చెప్పుకొచ్చారు. ధురంధర్‌ సినిమా విజయం నాకు స్పష్టమైన దారిని చూపడమే కాకుండా, నా కలల ప్రయాణానికి బలమైన పునాది వేసింది’’ అని చెప్పుకొచ్చారు సారా అర్జున్‌.