Flowers for Beauty: పువ్వులతో అందం

అమ్మాయిలు సున్నితం అని చెప్పడానికి వారిని పువ్వులతో పోల్చుతారు. పూలను సౌందర్య ఉత్పత్తుల తయారీలో వాడతారు. అయితే ఇంటి పెరట్లో పెంచుకునే పువ్వులు కూడా అనేక చర్మ సమస్యలను దూరం చేసి సొగసుకు సొబగులు అద్దుతాయి. ఆ సంగతులివీ..

• కేశాల సంరక్షణలో ముందుండే మందార పూలు చర్మ సంరక్షణకూ తోడ్పడతాయి. ఇందులోని విటమిన్లు, యాంటీ ఆక్సిడెంట్లు చర్మంపై మచ్చలను, పిగ్మెంటేషన్‌ను తగ్గిస్తాయి. విటమిన్‌ సి చర్మం నిగారించేలా చేస్తుంది. మందారపూలను రుబ్బి ఫేస్‌ప్యాక్‌ వేసుకుంటే పలు చర్మ సమస్యలు దూరమవుతాయి.

• మల్లెపూలు సుగంధాలను వెదజల్లడంతో పాటు చర్మ ఆరోగ్యానికీ సహాయపడతాయి. ఇందులోని యాంటీఆక్సిడెంట్లు మొటిమలు, మచ్చలను నివారిస్తాయి. ఫ్రీ రాడికల్స్‌ నుంచి రక్షణ కల్పిస్తాయి. మల్లె పూలు చర్మంపై దురద, వాపు, మచ్చలు వంటి సమస్యలు దూరం చేస్తాయి. మల్లెపూలను రుబ్బి ఆ పేస్టులో కొంచెం కొబ్బరి నూనె కలిపి ఫేస్‌ప్యాక్‌ వేసుకుంటే చర్మం నిగారిస్తుంది.

• బంతి పూలలో యాంటీ సెప్టిక్‌, యాంటీ బ్యాక్టీరియల్‌ గుణాలు పుష్కలం. ఇవి చర్మంపై గాయాలను మాన్పుతాయి. ముడతలు, వృద్ధాప్య ఛాయలను నివారించడంలోనూ బంతిపూలు ఉపయోగపడతాయి. బంతిపూలను మిక్సీలో వేసి మెత్తని పేస్టులా చేసుకుని ముఖానికి రాసుకోవాలి.