FY Results: ముత్తూట్‌, రిలయన్స్ నిప్పన్ రికార్డు స్థాయి వృద్ధి.. సరికొత్త శిఖరాలకు లాభాలు

హైదరాబాద్ : ముత్తూట్ ఫైనాన్స్ 2024-25 ఆర్థిక సంవత్సరంలో తన ఉనికిని మరింత బలోపేతం చేసుకుంది. కంపెనీ తన కార్యకలాపాల్లో అనూహ్యమైన వృద్ధిని నమోదు చేసింది. మార్చి 31, 2025 నాటికి ముగిసిన ఆర్థిక సంవత్సరంలో ముత్తూట్ ఫైనాన్స్ మొత్తం రుణాల నిర్వహణ (AUM) గతంలో ఎన్నడూ లేని విధంగా రూ.1,22,181 కోట్లకు చేరుకుంది. ఇది అంతకు ముందు సంవత్సరంతో పోలిస్తే ఏకంగా 37 శాతం అధికం. గతంతో పోల్చితే ఈసారి రూ. 33,102 కోట్ల అదనపు రుణాలు మంజూరు అయ్యాయి. సంస్థ ఏకీకృత నికర లాభం కూడా 20 శాతం పెరిగి రూ. 5,352 కోట్లకు చేరుకోవడం విశేషం. ముత్తూట్ ఫైనాన్స్ స్వతంత్రంగా చూస్తే, రుణాల నిర్వహణ కూడా గణనీయంగా పెరిగింది. మార్చి 31, 2025 నాటికి ఇది రూ. 1,08,648 కోట్లకు చేరుకుంది. వార్షికంగా చూస్తే ఇది 43 శాతం వృద్ధిని సూచిస్తుంది. స్వతంత్ర నికర లాభం కూడా 28 శాతం వృద్ధితో రూ. 5,201 కోట్లకు చేరింది. బంగారు రుణాల విషయంలో ముత్తూట్ ఫైనాన్స్ తన స్థానాన్ని మరింత సుస్థిరం చేసుకుంది. ఈ విభాగంలో రుణాల నిర్వహణ రూ. 1,02,956 కోట్లకు చేరుకుంది. ఇది గత ఆర్థిక సంవత్సరంతో పోలిస్తే 41 శాతం వృద్ధిని నమోదు చేసింది. ఈ సందర్భంగా ముత్తూట్ ఫైనాన్స్ ఛైర్మన్ జార్జ్ జాకబ్ ముత్తూట్ మాట్లాడుతూ, ఈ ఆర్థిక సంవత్సరం తమ ప్రయాణంలో ముఖ్యమైందన్నారు. రుణాల నిర్వహణ రూ. 1 లక్ష కోట్లు దాటడం తమకు ఎంతో సంతోషాన్నిచ్చిందని పేర్కొన్నారు. బంగారేతర రుణాలపై కూడా దృష్టి సారించామని, డిజిటల్ సేవలను మరింత మెరుగుపరచడానికి కృషి చేస్తున్నామని ఆయన తెలిపారు.

రిలయన్స్ నిప్పన్ లైఫ్ ఇన్సూరెన్స్ ఫలితాలు..

రిలయన్స్ నిప్పన్ లైఫ్ ఇన్సూరెన్స్ కంపెనీ (ఆర్ఎన్ఎల్ఐసీ) గత ఆర్థిక సంవత్సరం (2024-25)లోనూ నిలకడగా మంచి ఫలితాలు నమోదు చేసింది. అన్ని రంగాల్లోనూ ఆశాజనకమైన పనితీరు కనబరిచింది. పన్నుల ముందస్తు లాభం గణనీయంగా 25 శాతం పెరిగి రూ. 247 కోట్లకు చేరుకుంది. అంతకుముందు ఆర్థిక సంవత్సరంలో ఈ మొత్తం రూ. 198 కోట్లుగా నమోదైంది. కంపెనీ నిర్వహిస్తున్న ఆస్తుల మొత్తం విలువ కూడా 9 శాతం వృద్ధితో రూ. 38,725 కోట్లకు పెరిగింది. కొత్తగా వచ్చిన ప్రీమియంల ద్వారా రూ. 1,245 కోట్లు ఆదాయం రాగా, మొత్తం ప్రీమియంల ద్వారా వచ్చిన ఆదాయం రూ. 5,711 కోట్లుగా నమోదైంది. సాల్వెన్సీ నిష్పత్తి 235 శాతంతో మెరుగ్గా ఉంది. క్లెయిమ్ సెటిల్మెంట్ నిష్పత్తి 98.9 శాతంగా నమోదైంది. గత ఆర్థిక సంవత్సరంలో సుమారు 5.4 లక్షల మంది వినియోగదారులకు రూ. 3,523 కోట్ల ప్రయోజనాలను అందించింది. ఇది అంతకుముందు సంవత్సరం కంటే 8 శాతం ఎక్కువ. ఉద్యోగుల సంక్షేమానికి అధిక ప్రాధాన్యతనిస్తూ, వరుసగా ఆరో ఏడాది కూడా గ్రేట్ ప్లేస్ టు వర్క్ సర్టిఫికేషన్‌ను పొందింది. అంతేకాకుండా ‘టాప్ 50 లార్జ్ వర్క్‌ప్లేసెస్ బిల్డింగ్ ఏ కల్చర్ ఆఫ్ ఇన్నోవేషన్ ఫర్ ఆల్‌’ జాబితాలోనూ తన స్థానాన్ని నిలుపుకుంది. ఈ సందర్భంగా రిలయన్స్ నిప్పన్ లైఫ్ ఇన్సూరెన్స్ ఎగ్జిక్యూటివ్ డైరెక్టర్ & సీఈవో ఆశీష్ వోహ్రా మాట్లాడుతూ.. క్రమబద్ధమైన ప్రణాళికలు, వినియోగదారుల అవసరాలకు ప్రాముఖ్యం ఇవ్వడం, బలమైన ప్రాథమిక సూత్రాలే ఈ విజయానికి కారణమని అన్నారు. పంపిణీ వ్యవస్థను మరింత బలోపేతం చేయడం, వినియోగదారుల అనుభవాన్ని మెరుగుపరచడం వంటి చర్యలు తమకు ఎంతగానో సహాయపడ్డాయని ఆయన తెలిపారు. ఐఐహెచ్‌ఎల్, నిప్పన్ లైఫ్ ఇన్సూరెన్స్ సంస్థల కలయికతో మరింత ఉత్తమమైన ఫలితాలు సాధించగలమని ఆయన ఆశాభావం వ్యక్తం చేశారు. విశ్వసనీయత, వినూత్నత, స్థిరమైన పనితీరుతో భవిష్యత్తులోనూ ముందంజలో ఉంటామని ఆయన విశ్వాసం వ్యక్తం చేశారు.