Indian Culinary Success: దక్షిణాది వంటకంబు.. ఒహొహ్హొ మాకె ముందు..

• మన వంటకాలను అమితంగా ఇష్టపడుతున్న అమెరికన్లు

• యూఎస్‌లో పది వేల భారతీయ రెస్టారెంట్లు!

• భారతీయ రెస్టారెంట్ల కేంద్రంగా డాలస్‌ మెట్రో ఏరియా

• సాఫ్ట్‌వేర్‌ ఉద్యోగుల కన్నా కొందరు షెఫ్‌ల జీతమే ఎక్కువ

ఒక పాత సినిమాలో.. విలక్షణ నటి సూర్యకాంతం ‘డాలర్‌ బజ్జీ’ అని అమ్మితే నవ్వుకున్నాం!

కానీ.. ఇప్పుడా సీన్‌ నిజమైంది. అమెరికాలో దక్షిణ భారత రుచులకు ఆదరణ పెరుగుతోంది!!

భారతీయ ఆహారం అంటే నాన్‌, రోటీ, చికెన్‌ టిక్కా మసాలా వంటివే అనుకున్న అమెరికన్లు.. ‘కోరీ భుజింతును.. గోంగూర పచ్చడి..’ అంటూ ఇప్పుడు మన వంటకాలను లొట్టలేసుకుని తింటున్నారు.

(డాలస్‌ నుంచి కృష్ణమోహన్‌ దాసరి)

కాలిఫోర్నియాలోని సాఫ్ట్‌వేర్‌ కంపెనీలో పనిచేసే ఒక తెలుగు టెకీ.. తన సహోద్యోగులకు పార్టీ ఇవ్వాలనుకున్నాడు. అందరినీ మధ్యాహ్న భోజనానికి.. దగ్గర్లోని భారతీయ రెస్టారెంట్‌కు తీసుకెళ్లాడు. తీరా అక్కడికెళ్లాక.. వారు ఆర్డర్‌ చేసిన మెనూ చూసి నివ్వెరపోవడం అతని వంతయింది. ఎందుకంటే.. వారందరూ ఆర్డర్‌ చేసింది బిర్యానీలు, మసాలా కర్రీలు, మన దక్షిణాది వంటకాలు!! అమెరికన్లు సాధారణంగా మసాలాలు తక్కువగా ఉండే వంటకాలను ఇష్టపడతారు. విదేశీ వంటకాల్లో.. థాయ్‌ ఆహారానికి అమెరికన్లలో ఆదరణ ఎక్కువ. మొన్నమొన్నటిదాకా భారతీయరెస్టారెంట్లకు వచ్చినా కూడా.. చికెన్‌ టిక్కా మసాలా, బటర్‌ చికెన్‌, నాన్లు వంటివే ఎక్కువగా తినేవారు. రానురానూ ట్రెండ్‌ మార్చి.. ఇప్పుడు స్పైసీగా ఉండే దక్షిణాది ఆహారాన్నీ ఇష్టంగా తింటున్నారు. అమెరికాలో చైనీస్‌, ఫిలిప్పీన్స్‌వాసుల తర్వాత ఎక్కువ సంఖ్యలో ఉన్న ఆసియా వాసులు భారతీయులే.

కానీ జనాభా పరంగా చూస్తే భారతీయ రెస్టారెంట్ల సంఖ్య ఇప్పటి వరకూ చాలా తక్కువ. ఇప్పుడు అమెరికన్లు కూడా మన వంటకాలను ఇష్టంగా అడిగి తింటుండడంతో.. తెలుగు ప్రవాసులు యూఎస్‌ నగరాల్లో రెస్టారెంట్లను విరివిగా ప్రారంభిస్తున్నారు. 2025 అక్టోబరు గణాంకాల ప్రకారం అమెరికాలో దాదాపుగా పదివేల (9438) భారతీయ రెస్టారెంట్లు ఉన్నాయి. వీటిలో 2000 ఒక్క కాలిఫోర్నియా రాష్ట్రంలోనే ఉన్నాయి! దాదాపు 1500 రెస్టారెంట్లతో టెక్సాస్‌.. 1000 రెస్టారెంట్లతో న్యూయార్క్‌ తరువాతి స్థానాల్లో ఉన్నాయి. ముఖ్యంగా న్యూయార్క్‌, లాస్‌ఏంజెలెస్‌, షికాగో, డాలస్‌, హ్యూస్టన్‌ ప్రాంతాల్లో వీటి సంఖ్య పెరుగుతోంది. డాలస్‌ మెట్రో ఏరియా.. దక్షిణ భారత రుచులను అందించే రెస్టారెంట్లకు హబ్‌గా మారింది. ఈ ప్రాంతంలో దాదాపు 400 ఇండియన్‌ రెస్టారెంట్లు ఉన్నాయంటే పరిస్థితిని అర్థం చేసుకోవచ్చు. నేపాలీ, పాకిస్థాన్‌, బంగ్లాదేశ్‌ రెస్టారెంట్లు అదనం. కానీ.. వారు కూడా తమ రెస్టారెంట్లను ఇండియన్‌ రెస్టారెంట్ల పేరుతోనే నిర్వహిస్తుండడం విశేషం.

‘లెక్క’ చేయట్లేదు!

అమెరికాలో ఉండే మనోళ్లు.. గతంలో రెస్టారెంట్లలో ధరలను భారత్‌లోని ధరలతో పోల్చి చూసుకుని.. జిహ్వచాపల్యాన్ని అదుపులో ఉంచుకునేవారు. ఇప్పుడు.. బయట తినాలని అనిపించిందే తడవుగా కుటుంబసభ్యుల్ని, మిత్రుల్ని వెంటబెట్టుకుని వెళ్తున్నారు. ఈ డిమాండుకు తగ్గట్టుగా.. భారతీయులు గణనీయంగా ఉన్న ప్రతి నగరంలోనూ వీధికో ఇండియన్‌ రెస్టారెంటు వెలుస్తోంది. డాల్‌సలో 12 డాలర్లుండే చికెన్‌ బిర్యానీ, కాలిఫోర్నియాలో 25 డాలర్లు. సియాటెల్‌లో ఇంకా ఎక్కువ. అయినా.. మన రెస్టారెంట్లు కిక్కిరిసే ఉంటున్నాయి. యూఎ్‌సలో ప్రతి ఊరిలోనూ బావార్చీ బిర్యానీ, బిర్యానీ బెస్ట్రో, బిర్యానీ పాట్‌, హైదరాబాద్‌ హౌస్‌, ప్యారడైజ్‌, స్వదేశీ మొదలైన పేర్లతో రెస్టారెంట్లు పుష్కలంగా కనిపిస్తాయి. వీటితోపాటు ఇండియాలో ఎంతో ప్రసిద్ధి పొందిన శరవణ భవన్‌, అడయార్‌ ఆనంద భవన్‌, బార్బిక్యూ నేషన్‌, పిస్తా హౌస్‌ మొదలైన గ్రూపులు అమెరికాలో కూడా ఫ్రాంచైజీ మోడల్‌లో రెస్టారెంట్లు నిర్వహిస్తున్నాయి.

దశాబ్దాల క్రితమే..

అమెరికాలో భారతీయ రెస్టారెంట్ల విప్లవం శ్రీకారం దిద్దుకోవడానికి కాలిఫోర్నియా బర్కిలీకి చెందిన లక్కిరెడ్డి బాల్‌ రెడ్డి ఆద్యుడని చెప్పాలి. 40-50 సంవత్సరాలకు పూర్వమే ఆయన భారతీయ రెస్టారెంట్లను స్థాపించారు. కృష్ణాజిల్లా మైలవరం దగ్గర వెల్వడం గ్రామానికి చెందిన లక్కిరెడ్డి, 1970ల్లో ప్రారంభించిన పసంద్‌ అనే ఇండియన్‌ రెస్టారెంటు 3 దశాబ్దాలు దక్షిణ భారత వంటకాలతో అలరించింది. అదే గ్రామానికి చెందిన తానా మాజీ అధ్యక్షుడు కోమటి జయరాం ప్రారంభించిన స్వాగత్‌ గ్రూపు రెస్టారెంట్లు 35 ఏళ్లుగా కాలిఫోర్నియాలోని సిలికాన్‌ వ్యాలీ భోజన ప్రియుల జిహ్వలను తృప్తి పరుస్తున్నాయి. మైలవరం ప్రాంతం నుంచి షెఫ్‌లుగా, రెస్టారెంటు ఓనర్లుగా వచ్చినవారు అమెరికాలో పెద్ద సంఖ్యలో ఉండడం గమనార్హం. ఇండియన్‌ క్విజిన్‌లో ఉండే ఇంద్రజాలం.. అమెరికన్లను కూడా సమ్మోహితుల్ని చేయడం ఇటీవలే ప్రారంభమైంది. దీంతో ఈ వ్యాపారంలోకి ప్రవేశించే వారి సంఖ్యా పెరుగుతోంది. ప్రస్తుతం అమెరికాలో సాఫ్ట్‌వేర్‌ ఉద్యోగుల కంటే.. కొన్ని భారతీయ రెస్టారెంట్లలో షెఫ్‌లే ఎక్కువ సంపాదిస్తున్నారంటే అతిశయోక్తి కాదు. అమెరికాలో మనోళ్ల రెస్టారెంట్ల సంఖ్య పెరుగుతున్నా.. సక్సెస్‌ రేటు అనుకున్నంత లేదు. షెఫ్‌ల జీతాలు భరించలేని స్థాయిలో పెరిగిపోవడం దీనికి కారణం.