Heavy Rains: ఉధృతంగా కృష్ణా, గోదావరి

భారీగా పెరిగిన వరద

• సాగర్‌ నుంచి 4.78 లక్షల క్యూసెక్కులు

• భద్రాచలంలో మొదటి ప్రమాద హెచ్చరిక

• ఏలూరు ఏజెన్సీ లోతట్టు ప్రాంతాలు జలమయం

• పునరావాస కాలనీలకు తరలుతున్న జనం

(ఆంధ్రజ్యోతి న్యూస్‌నెట్‌వర్క్‌): ఎగువ రాష్ట్రాల్లో కురుస్తున్న భారీ వర్షాలకు కృష్ణా, గోదావరి నదులు ఉధృతంగా ప్రవహిస్తున్నాయి. ప్రకాశం బ్యారేజీ వద్ద కృష్ణానదికి మొదటి ప్రమాద హెచ్చరిక కొనసాగుతోంది. బుధవారం శ్రీశైలం నుంచి నాగార్జునసాగర్‌కు 4,61,639 క్యూసెక్కుల వరద వస్తోంది. దీంతో నాగార్జునసాగర్‌ 26 గేట్ల ద్వారా దిగువకు నీటిని విడుదల చేస్తున్నారు. సాగర్‌ డ్యాం పూర్తిస్థాయి నీటిమట్టం 590 అడుగులు కాగా, ప్రస్తుతం 583.70 అడుగులకు చేరింది. డ్యాంలో 293.68 టీఎంసీల నీరు ఉంది. మొత్తం 4,78,384 క్యూసెక్కుల నీటిని దిగువకు విడుదల చేస్తున్నారు. మరోవైపు గోదావరి ఉపనదులు, కొండవాగులు పొంగిపొర్లుతున్నాయి. కడెం, మంజీర, హరిద్ర, ఇంద్రావతి, మానేరు, ప్రాణహిత, కిన్నెరసాని, శబరి, సీలేరు ఉపనదులు పొంగి గోదావరిలో కలుస్తుండటంతో బుధవారం భద్రాచలం వద్ద నీటిమట్టం 45.40 అడుగులకు చేరింది. దీంతో మొదటి ప్రమాద హెచ్చరిక జారీచేశారు. సాయంత్రానికి ఇది 47 అడుగులకు పెరిగింది. 48 అడుగులకు చేరితే రెండో ప్రమాద హెచ్చరిక జారీచేస్తారు. భద్రాచలం నుంచి దిగువకు 10.7లక్షల క్యూసెక్కుల నీరు ప్రవహిస్తోంది. తూర్పుగోదావరి జిల్లా ధవళేశ్వరం కాటన్‌ బ్యారేజీ వద్ద గోదావరి నీటిమట్టం 10.50 అడుగులకు చేరుకుంది. ఏలూరు జిల్లాలోని వేలేరుపాడు, కుక్కునూరు మండలాల్లోని పలు లోతట్టు ప్రాంతా లు నీట మునిగాయి. రేపాకగొమ్ము గ్రామస్థులను దాచారం ఆర్‌అండ్‌ఆర్‌ కాలనీకి తరలించేందుకు అధికారులు చర్యలు చేపట్టారు. కుక్కునూరు మండలంలో కుక్కునూరు-దాచారం రహదారి ముంపునకు గురైంది. పోలవరం ప్రాజెక్టు నుంచి 8,78,421 క్యూసెక్కులు దిగువకు విడుదల చేస్తున్నారు. స్పిల్వే ఎగువన 32.100 మీటర్లు, దిగువన 23.520 మీటర్ల నీటిమట్టం నమోదైనట్టు జలవనరుల శాఖ అధికారులు తెలిపారు. ఇక తుంగభద్ర జలాశయానికీ వరద ఉధృతి పెరుగుతుండటంతో 26 గేట్లను ఎత్తి 1.28 లక్షల క్యూసెక్కుల నీటిని దిగువకు విడుదల చేస్తున్నారు. ఎగువన భారీ వర్షాలు కురుస్తుండటంతో తుంగ, భద్ర జలాశయాలు నిండాయి.