NRI: యూటాలోని స్కూల్ డిస్ట్రిక్టల్‌లో కింగ్ జేమ్స్ బైబిల్‌పై నిషేధం
ABN , First Publish Date - 2023-06-04T16:06:02+05:30 IST
యూటా రాష్ట్రంలోని ఓ ప్రాంతంలో స్కూళ్లు.. కింగ్ జేమ్స్ బైబిల్‌పై నిషేధం విధించాయి. ప్రాథమిక, మాధ్యమిక పాఠశాల విద్యార్థుల కరిక్యులమ్ నుంచి తొలగించాయి.
ఎన్నారై డెస్క్: యూటా(Utah) రాష్ట్రంలోని ఓ ప్రాంతంలో స్కూళ్లు.. కింగ్ జేమ్స్ బైబిల్‌పై(King james bible) నిషేధం విధించాయి. ప్రాథమిక, మాధ్యమిక పాఠశాల విద్యార్థుల కరిక్యులమ్ నుంచి తొలగించాయి. సాల్ట్ లేక్ సిటీకి తూర్పున ఉన్న డేవిస్ స్కూల్ డిస్ట్రిక్ట్ ప్రాంతంలోని స్కూళ్లు ఈ నిర్ణయం తీసుకున్నాయి. కింగ్ జేమ్స్ బైబిల్‌లో కొన్ని భాగాలు హింసాత్మకంగా, అభ్యంతరకంగా ఉన్నాయంటూ గతేడాది కొందరు తల్లిదండ్రులు ఫిర్యాదు చేయడంతో ఈ నిషేధం విధించారు. 2022లో రూపొందించిన విద్యా చట్టం ప్రకారం, యూటా రాష్ట్రంలో అభ్యంతర పుస్తకాలను స్కూళ్ల నుంచి తొలగించవచ్చు.
అయితే, కింగ్ జేమ్స్ బైబిల్‌లోని విషయాల్ని పిల్లలకు తమ స్కూళ్లల్లో ఎప్పుడూ బోధించలేదని డేవిస్ స్కూల్ డిస్ట్రిక్ట్ అధికారులు తెలిపారు. ఈ బైబిల్‌కు సంబంధించి ఏడు, ఎనిమిది కాపీలను తీసేసినట్టు పేర్కొన్నారు. బైబిల్‌లోని ఏయే భాగాలు అభ్యంతరకరమో వారు వెల్లడించలేదు. అయితే, కొత్త చట్టం ఆధారంగా బైబిల్‌ను నిషేధించడం హాస్యాస్పదమని చట్టం రూపకర్తల్లో ఒకరు గతవారం వ్యాఖ్యానించారు. ఆ మరుసటి వారమే ఆయన తన రూటు మార్చుకున్నారు. విద్యార్థులకు ఈ బైబిల్ పఠనం ఓ సవాలేనని వ్యాఖ్యానించారు.
