బద్ధకస్తులకు బంపరాఫర్.. అలాంటి వారికే ఉద్యోగాలు ఇస్తారట.. వైరల్ అవుతున్న ప్రకటన

సాధారణంగా ఏ కంపెనీ అయినా తెలివైన వారికి, చురుకైన వారికి ఉద్యోగాలు ఇస్తుంది. విద్యార్హతలు, నైపుణ్యాలు, అనుభవం పరిగణనలోకి తీసుకుని ఉద్యోగులను ఎంచుకుంటుంది. అయితే ఓ యజమాని మాత్రం అందుకు భిన్నంగా వ్యవహరిస్తున్నాడు. తమ దగ్గర పనిచేయడానికి ఎలాంటి డిగ్రీలు, నైపుణ్యాలు అక్కర్లేదని,  కేవలం బద్ధకస్తులైతే చాలని ప్రకటించాడు. 

`మీరు బద్ధకంగా, నిత్యం అసంతృప్తితో ఉండాలి. అలాగైతే ఇప్పటికే ఇక్కడ ఉన్న సిబ్బందితో కలిసిపోగలరు. మీకు అలాంటి లక్షణాలు ఉంటే బయోడేటా పట్టుకుని రండి. వచ్చే ముందు తప్పకుండా స్నానం చేసి రండి` అని ఓ దుకాణం ముందు బోర్డు పెట్టారు. ఆ బోర్డు సోషల్ మీడియాలో వైరల్ అవుతోంది. ఈ ప్రకటనపై నెటిజన్లు తమదైన శైలిలో కామెంట్లు చేస్తున్నారు. `ఇదే నా డ్రీమ్ జాబ్` అని ఓ నెటిజన్ కామెంట్ చేశాడు. `నేను చాలా బద్ధకస్తుడిని, ఇంటర్వ్యూకు కూడా రాలేన`ని మరో వ్యక్తి పేర్కొన్నాడు. `నా అర్హతలకు తగిన జాబ్` అని మరో వ్యక్తి కామెంట్ చేశాడు.