Marriage అయిన 3 నెలలకే కట్టుకున్న భర్తను దారుణంగా హత్యచేసి.. మృతదేహాన్ని..!

చెన్నై/అడయార్‌ : పుదుక్కోట జిల్లాలో వివాహమైన మూడు నెలల్లోనే కట్టుకున్న భర్తను ఓ మహిళ దారుణంగా హత్య చేసి మృతదేహాన్ని బావిలో పడేసిన సంఘటన వెలుగులోకి వచ్చింది. జిల్లాలోని గాంధర్వకోట ప్రాంతానికి చెందిన పాండిదురై (30) అనే కార్మికుడికి మూడు నెలల క్రితం నందిని (30)తో వివాహం జరిగింది. అయితే, వీరిద్దరి మధ్య మనస్పర్థలు తలెత్తింది. ఈ నేపథ్యంలో గత నెల 20వ తేదీన పాండిదరై కనిపించకుండా పోయాడు. దీనిపై పాండిదురై తల్లి పోలీసులకు ఫిర్యాదు చేయగా, కేసు నమోదుచేసిన పోలీసులు విచారణ చేపట్టారు. ఈ విచారణలో తమ మధ్య ఏర్పడిన గొడవల్లో కత్తితో దాడి చేయడంతో పాండిదురై చనిపోయినట్టు నందిని అంగీకరించింది. మృతదేహాన్ని ఎవరూ లేని సమయంలో ఈడ్చుకెళ్ళి పాడుబడిన బావిలో పడేసినట్టు పోలీసులకు తెలిపింది. దీంతో పోలీసులు మృతదేహాన్ని స్వాధీనం చేసుకుని, నందినిని అరెస్టు చేశారు.